Dawa ki Nongtrei Aganwadi ban thungkam pura bad kyntiew bainong T.15 hajar

Ki nongtrei Anganwadi ki dawa ia ka sorkar ban kyntiew kyrdan ia ki nongtrei Aganwadi ba la pyndep ia ka kyrdan graduate, ban thungkam pura noh ia ki bad ban pynkiew ia ka honorarium ne ka bainong T.15,000 shibnai. Ha ka shithi ba la phah sha u Myntri Rangbah ka Jylla u Conrad K Sangma, ki nongtrei Anganwadi ki la ong, ba ka Sorkar Meghalaya ka kubur ia ka jingkongsan ki nongtrei Anganwadi ban pyntreikam ia ki skhim ka Sorkar kum ka Maternal & Child Health Program, Supplementary Nutrition Program bad ka Easrly Childhood Education. Hynrei ki nongtrei Anganwadi ha Meghalaya ba la pass degree bad ba la trei da ki phew snem, kim shym la ioh ia ka jingkyntiew kyrdan hapoh ka por ba dei, wat ki la pyndep lut ia ki kyndon treikam ha ki kyrdan bapher bapher.

“Kumta ngi dawa ban pyntreikam noh mardor ia ka jingkyntiew kyrdan ba sahteng ia ki nongtrei Anganwadi ba la pyndep graduate katkum ka memo ba 2 tarik Jylliew 2023” ki la ong. Haba pynpaw bun na ki nongtrei Anganwadi ha Meghalaya ki dang iai bteng ban trei da ka jingsiew honorarium, wat la ki pyntrei ia ki skhim ba la pynwandur thymmai jong ka Sorkar kiba batai ia ki kyndon treikam, ka shithi ka ong ba ka Contract Labour (Regulation and Abolition) Act, 1970, ka Industrial Dispute Act, 1947 bad kiwei kiwei ki Labour Laws ki kren ba ki nongtrei ba la trei khlem sangeh da ki snem hapoh ki skhim ka Sorkar ki dei ban thung kam pura, ban ioh ia ka kam ba shngain, ka jingsiew ba ia hap, ki jingmyntoi ba shongthait, bad kiwei kiwei.

“Ngi kyntu ia ka Sorkar Meghalaya ban thungkam pura noh ia ki nongtrei Anganwadi katkum ka Meghalaya Service Rules, kaba ithuh iau  synniang ba ki ai na ka bynta ka bit ka biang ki paidbah” ka la ong. Haba kdew ia ka nongrim kajuh ka jingsiew ia kajuh ka kam ba la kdew ha ka Labour Laws, ka shithi ka ong ia mynta, ki nongtrei Anganwadi ki ioh ia ka honorarium na ka bhah ka Jylla ba long T.3000 na ka Sorkar Pdeng T.4500 shibnai, ka bym pat biang satia ban pyndap ia ki jingdonkam bad ki jinglut jingsep. Ha kiwei ki Jylla, ki nongtrei Anganwadi ki ioh ia ka honorarium ba heh nalor kiwei ki jingmyntoi.“Kumta, ngi dawa ban pynkiew noh ia ka honorarium sha ka T15,000 shibnai, kaba long kat kum ka National Standard bad ki jingai jingmut ka Sorkar” ka la bynrap.