Tieedi Permaculture Foundation bad ka Tetra Pak

Ki ïing bad ki jaka trei ha Darjeeling District mynta ki la don ïa ka rukom pyntreikam kaba la pynwandur bha na ka bynta ban sain biang ïa ki synduk song jingdih, ka jingai khublei baroh ka iaid sha ka jingïatreilang hapdeng jong ka Tieedi Permaculture Foundation bad ka Tetra Pak. Kane ka jingsnohkti, ym tang ba ka pyntikna ban long kiba don bynta ban sain biang ia kine ki synduk hynrei ka pynkup bor ruh ïa ki nongtrei ba pynkhuid ïa ki jaboh da kaba ai ka jingithuh, ka jinghikai, bad ki lad sumar. Ka Tieedi, ka seng kaba trei na ka bynta ka mariang kaba don ruh ia ka jingkut jingmut ban pynduna ïa ka jingpynmih jaoboh shuh, ka lah ïatreilang bad ka Tetra Pak, ka kompany kaba pawnam bha ha ka pyrthei baroh kawei ha ka liang ka jingsain ia ki jingbam bad ka jingpynmih ia ki song jingbam, ban thaw ïa ka jaka lum ïa ki song jingdih bad sain biang ia ki. Kane ka jingsdang kan iarap ha ban wad ïa ki synduk ba lah dep pyndonkam lyngba ki nongtrei ba pynkhuid jaboh bad ka jingiashim bynta jong ki nongshong shnong. Ïa kine ki song kiba la dep lum, yn sa phah sha ka jaka sain kaba don hajan, kata ka Khatema Fibres, ha Uttarakhand ban sain biang ia ki sa shisien pat.

Kum shi bynta jong kane ka jingsdang treikam, ka Tieedi ka la ïatrei ha syndah bad ki nonglum jaboh ban pynskhem ïa ka kam jong ki ha ki jaka pynkhuid ïa ki jaboh. Kine kiba pynkhuid jaboh kin sa ïoh jinghikai kumno ban lum bad pynïakhlad ïa ki song jingdih kiba dang biang. Ïa kine ki nongtrei yn ai ruh ïa ki lad ai jingïarap kum ki Health Card ban ïoh lad jingsumar, bad ban pynïasoh ïa ki bad ki jaka treikam kiba kham skhem na ka bynta ban nang ïoh kamai kham bun.

Shuh shuh, ki samla pule na Sonada Degree College kin don ka bynta kaba kongsan ban lum jingtip shaphang kine ki nongtrei kiba pynkhuid jaboh ban ïarap ban pynjan ïa ka jingwad jingtip halsor ki jingeh kiba ki mad ha ka liang ka kam ban pynkhuid ia ka jaboh. Ki song jingdih kiba lait na ki jakhlia, kiba lah shna 70% da ka kot, ki long kiba lah ban sain bad pyndonkam biang bad ïa ki lah ban sain biang sha ban shna ia ki tiar ki tar na ka kot kum ia ki synduk ne kot song jingsong, ki jingsong ba pyndonkam ha ki e-commerce, ki kot ban thoh, ki jingsop tnum na ki poly-aluminum panels, bad ki composite sheet ba la pyndonkam da ki karkhana kali bad karkhana pynkit jingkit, bad na ka bynta ban shna tiar ïing bad kiwei kiwei de. U Utsow Pradhan, u nongseng jong ka Tieedi, u la bynrap, “Ngi sngew kmen shaphang kane ka jing ïatreilang bad ka Tetra Pak India namar ka wanrah ia ka jingsdang jong ka ban don ka jingiatreilang hapdeng ki nongpynmih ia ki mar ki mata bad ki seng kiba don ha ki shnong ban weng ia ki jingeh ha kaba iadei bad ka jingpynkhuid ia ka jaboh na ki lum jong ngi. Ka long ruh ka sien jam kaba nyngkong ha kaba kine ki nong tam jaboh (kabaadiwalas) kiba bunsien ym ju don ba pyrwa ki lah ïoh ïa ka rynsan ha kaba ia ka jingtreikam jong ki la ioh ia ka jingithuh bad ba ki lah ïoh ïa ka jingburom kumba kidei ban ioh ha ka imlang sahlang. Wat lada kine ki kabaadiwalas ki trei ïa ki kam kiba ym don ka jaka treikam, hynrei kidei kiba don ia ka bynta kaba kongsan ban pynbha ia ka mariang ha India ha kaba ka ka pyntikna ba ki jaboh kiba heh ba khraw kiba la shu bret khlem suidniew da ki nongthied kin poi sha ki jaka sain. Ngi ai khublei ïa ka Tetra Pak India ïa ka jingkyrshang jong ki ïa kane ka jingpyntrei.”

Ka Juhi Gupta, Sustainability Director Tetra Pak South Asia, ka la ong, “Kane ka jingïatreilang ka long ka nuksa kaba khraw jong ki nongtrei kiba ïa don kajuh ka jingmut kiba ïatreilang ban shim ïa ka jingeh jong ki bad pynkylla ïa ka sha ka lad ban leh ïa kaba dei  Ngi sngewkmen eh ban ïatreilang bad ka Tieedi ha kane ka sienjam bad ngi ngeit ba ryngkat lang  ngin wanrah ïa ka nuksa ha ka thain ban don ka jingtreikam kaba lang shaduh sha trai, kaba wanrah ia ki lad ki lynti ban pynlong ia ka shnong ka thaw ban pynkhuid ia ki jaboh kaban ai jingmyntoi lang ia ka mariang bad pynlong ia ki briew ban trei na ka bynta ban wanrah jingkhuid.”