Hiar ki pulit sha Pilangkata ban thaw VDP bad CLG na bynta ka shongsuk

Da ka jingangnud ban don ka jingiatreilang hapdeng ki bor ka tnad pulit bad ki nongialam shnong, ki seng samla bad kiwei ban pynneh ia ka peitngor ia ki kam sniew ban pynneh ia ka shongsuk shongshngain ha ki shnong ki thaw, mynta ka sngi ki bor pulit ka Ri Bhoi District, ki la pynlong da ka jingiakynduh lang bad ki nongialam shnong ha ka thaiñ Pillangkata ban ia tai halor shibun ki mat.

Ia kane ka jingialang la pynlong ha ka Pillangkata Police Outpost, ha kaba la ia shimbynta da ki heh pulit ki nongialam shnong, ki secretary shnong bad ki nongialam shnong ka thaiñ Pillangkata ban iatai ruh halor ka jingdonkam ban don da ka Village Defence Party (VDP) bad ka Community Liaison Group (CLG) ha kaba la sam ruh ia ki form na bynta kito ki dkhot kiban iasoh ha kane ka kynhun ia kaba la bthah ban aiti pat ha ka 10 tarik Jymmang.

Na ka liang u Superintendent of Police ka Ri Bhoi District, u VS Rathore u la pyntip, ba ka jingthmu jong kane ka jingiakynduh lang bad ki nongialam shnong ka long ban ioh ia ka jingiatreilang na bynta ban peitngor ia ki kam sniew bad ban pynneh ia ka shongsuk shongshngain ha ki shnong ki thaw khamtam ha ki jaka khappud.

U la pyntip ruh, ba kum kine ki jingialang ha kiwei kiwei ki shnong ki thaw ban pynsngewthuh halor ki kyndon ain kum ka POCSO bad kiwei kiwei, ka jingkynrei ki kam tuh kali, ka jingjyllei jong u drug, khamtam halor ka jingkongsan jong ki kynhun VDP bad CLG bad ban ioh thaw ia kine ki kynhun hapoh ka 31 tarik u Jymmang 2025.