Yn iakren ka Farmers’ Front bad ka sorkar ban pynkiew dor ia u synsar

Ka Farmers’ Front jong ka seng sain pyrthei ka National People’s Party (NPP) hynne ka sngi ka la rai ban iakren bad ka Sorkar Jylla ban pynkiew noh ia ka dor synsar bad ban shimkhia halor ka jingbam khniang ki dieng kwai. Hadien kane ka jingialang jong ka NPP Farmers Front, u Nongaiktien ka NPP Bah Himalaya Shangpliang haba iakren bad ki nongthoh khubor ula ong ba ka dor synsar kaba la buh da ka Sorkar ka long kaba rit palat bad kumta kin leit iakren bad ban kyrpad ia ka Sorkar ban pynkiew dor ia u synsar. Ula ong, kawei ka jingeh ba ki nongrep ki mad ka dei ba ki pynmih palat ia ka 2000-3000 kilo hynrei la buh pat ia u pud ba tang 800 kilo bad kin leh kumno ia u synsar ba sah, kumta ka sorkar ka dei ban shong pyrkhat biang halor kane.

Ka Farmers’ Front kan kyrpad ruh ia ka Tnad Agriculture bad Horticulture ban shimkhia halor ka jingbam khniang ki diengkwai bad ban ai jingiarap ia ki nongrep kwai ha kaba ki nongrep na West Khasi Hills bad South West Khasi Hills, kila mad ia ka jingeh na kane ka jingshah bam khniang ki diengkwai ki jongki bad kila kyrpad ia ki tnad sorkar ban khmih bniah ban wad ia ka daw jong ka jingbam khniang ki dieng kwai kaba la pur mynta ha kylleng ki district jong ka jylla. Ula ong ba ka Farmers Front kan leit ruh ban pynsngewthuh ia ki paid nongrep kwai ba ki lah ban ioh ia ka jingiarap lyngba ka CM ASSURE scheme.

“Bun na ki nongrep kim pat tip ia kane ka skhim. Kane kadei namar ki don ruh kiwei ki bor bad ki daw kiba pynlong ia ki nongrep ban sheptieng ban shim ia kane ka skhim ba ki lah ban ym ioh ia ka pisa ha ka por kaba biang hynrei kam long satia kumta. Ngi la kren shai sha ki nongrep ba shisien ba ki nongrep kila pynrung kyrteng, ia ka pisa la pyllait hi mar mar” la ong u Bah Shangpliang bad ka iathuh ba haduh ka 21 tarik Iaiong, kila don haduh 5657 ngut ki nongrep kila pynrung kyrteng ialade hapoh ka CM ASSURE Scheme.