Pyndep ka Raid Marngar ia ka lehniam pomblang ha Iewmawlong

Ban pynneh pynsah ia la ka niam ka tynrai kyrpang eh ruh ban duwai phirat na bynta ka bha ka miat ka roi ka par ki khun ki hajar, ka Dorbar Raid Marngar, hapoh ka Hima Mylliem ka la ioh ban pyndep ia ka lehniam Pom Blang kaba ju pynlong shisien shisnem ha ka jaka jong ka Raid hapdeng ka Iewmawlong ka iew kaba long shisien shitaiew ha sor Nongpoh.

La wan ban sakhilang ia kane ka lehniam Pom-Blang ka Raid Marngar, da u Pa’iem Ainam Syiem, Syiem ka Hima Mylliem, u Basan Nongkseh, Basan Nongumlong na ka Hima Mylliem, u Pa’iem Richard Syiem, Syiem ka Raid Marngar nalor ki Longsan Mansan lem bad ki nongmihkhmat na ki Kur kiba hapoh ka Raid Marngar.

Ka Leh niam pomblang jong ka Raid Marngar ka dei kawei na ka lehniam ka ju pynlong ia khniam ka khriam ba shisien shisnem ha u bnai Iaiong la ju pynlong hapoh ka Hat Marngar ha Iewmawlong, ha kaba la ju pyndonkam da kawei ka blang lieh, u Syiar ryngkuh basaw bad ka syiar iong, u klong, u skhaw, u khaw, kpu rew bad u lota um slakait ka waitlam bad kiwei kiwei.

Na ka liang u Syiem ka Raid Marngar, u Pa’iem Richard Syiem, u la pynpaw ia ka jingkmen ba sa shisien pat la lah ban bteng ia kane ka lehniam kaba kongsan jong ka Raid shibynta ban ainguh ia u Nongbuh Nongthaw halor ki jingkyrkhu kiba u la theh sei hapoh ka Raid nangta ban nang iai kyrpad ba un ri un sumar, u kyrkhu ha ka koit ka Khiah, ka khaii ka pateng, ka rep ka riang bad kiwei kiwei khnang ba ki khun ki hajar jong ka Raid kin ioh ia kine ki jingkyrkhu.

U la iathuh ruh, ba ha kane ka lehniam, u sohsla jong ka Kur Syiem nyngkong un shim ïa u syiar ryngkuh bad un ot na ryndang bad un pynjaw snam ha duwan, u sangot Raid na ka Kur Damlong un shim ïaka syiar iong bad un ot kumjuh bad u Sohsla jong ka Kur Syiem un pom ïaka Blang na ryndang haduh ban da dkut thui bad ban peit ia ka dak ki shin jong ka jingbha bad jingsniew bad lada ka khlieh jong ka blang ka hap hapoh ka sla ki kheiñ ba ka dei ka jingman bha hapoh ka Raid hi baroh kawei.

Shuh shuh ruh, da la pyndep ia ka lehniam leh rukom baroh, kan bud pat sa ka shad mastieh ban lehkmen bad ka jingai nguh ia u Blei Nongbuh Nongthaw, la bynrap ba ha kane ka lehniam ki kynthei kim bit ban ia shimbynta lait noh tang ban wan sakhi ha katei ka lehniam.