Ka sorkar kan ai jingshakri katba lah ia ki lanot lynshop mariang

U Myntri ka Sorkar Jylla u Bah Kyrmen Shylla uba khmih ia ka tnad Revenue & Disaster Management hynne ka sngi ula ong, ba ka jingwan lynshop ka bor mariang ka dei kaei kaei kaba ym lah ban tip bad kaba lah ban jia ha kano kano ka por, hynrei ki bor sorkar kin ialeh ban ai ia ka jingshakri kaba bha tam ia ki nongshong shnong ka jylla.

 “Ha ka aiom lyiur, ka jylla ka ju mad ia ki jingjia kiba sngewsih man la ka snem, mynta ka kynti ruh ki ophisar ki jong ki la trei ia ka kam bad leh bun kiei kiei kumba ki la ju leh barabor, hynrei kaei kaba lah ban iarap ia ngi ban iakhun ia kane ka jingjia, ka dei da ka jingiarap mar kylliang. Lada ngi lah long kiba husiar bad ngim khein sting namar ba ka jylla ka dei kaba don bun ki riat ki ram bad ka hap ruh hapoh ka Seismic Zone V, kumta ka long kaba donkam ba ngin long kiba husiar bha” ong u Bah Kyrmen haba iakren bad ki nongthoh khubor.

Ula ong ba ka sorkar jylla kan leh ia kaba bha tam ha kaban ai jingshakri ia ki paidbah hynrei lada ki pyrshang katno katno ruh, ki jinwan lynshop ka bor mariang ki lah ban jia ha kano kano ka por ia kaba ym lah ban tip lypa.“Nga kyntu ia ki nongshong shnong ka jylla ba kin long kiba husiar bad ban iatreilang bad ngi ban pynthikna ba kam dei ban don ka jingduh ia kano kano ka mynsiem briew” ong u Bah Kyrmen.