Tur ka HANM sha Toll Gate Mawkhanu ba kynnoh shah beh kam ki nongtrei Khasi

Ka Hynniewtrep Achik National Movement (HANM) East Khasi Hills, hynne ka sngi ka la tur sha Toll Gate kaba don ha Mawkhanu halor ka jingkynnoh ba shah beh kam ki khasi kiba trei ha katei ka jaka. Ka seng hapoh ka jingialam jong jong u samla Bawan Nongsiej General Secretary bad Bah Lewin Syiemsad President ki la hiar sha katei ka jaka bad ki la maham ba ki Khasi kim dei ban shah niew poh. Ha ka jingleit hiar jong ka seng ha katei ka jaka nyngkong ki la don tang ki bar jylla hynrei kham hadien la wan mih sa katto katne ki Khasi kiba la iathuh ba ma ki ruh ki trei ha katei ka jaka.

Ka seng ka phah khot ia u manager uba la wan poi sha katei ka jaka bad iakren ha kaba iadei bad ka jingshah khniot bein ki Khasi. U samla Bawan ula ong ba ka seng ka la maham ia u Manager ba lada nangne shakhmat ki dang iai nion bein ia ki khasi, kin shim da kiwei ki lad ki lynti bad kin banse ban wan beh lut ia baroh ki bar Jylla kiba don ha kane ka jaka.

Katkum ka jingiathuh u Bah Bawan Nongsiej la ong ba ki don kumba 20 ngut eiei ki nongtrei Khasi bad ia kaba kum kane ka jait kam ym tang ki bar jylla kiba lah hynrei wat ki Khasi ruh ki la lah ban trei. Ka seng ka la dawa ba dei ban sahngeh ka thep kam ia ki bar jylla ha kane ka kompeni bad kidei ban thep beit da ki ri ri na kane ka jylla.