U Myntri ka Tnad Jngohkai u Bah Paul Lyngdoh hynne ka sngi ula pyntip ka jylla Meghalaya ka la ioh ar tylli ki Pan-Asian Awards na ka WOW Awards Asia, kawei na ki rynsan ba heh ka dewbah Asia ban ithuh ia ki tamasa ba la leh da ka Event FAQs bad KPMG. “Ngi dap da ka jingsngewtynnad ban pyntip ba ka Shillong Cherry Blossom Festival 2024 ka la jop ia ka Gold Award ha ka ‘Special Event of the Year (Government)’ katba ka ‘Me·gong Festival’ ka la ioh ia ka Gold Award ha ka ‘Festival of the Year (Culture). Kine ki dei ki jingmih na ki tamasa kiba ngi lah pynlong, khamtam eh ia ka Cherry Blossom Festival” ong u Bah Paul haba iakren bad ki nongthoh khubor. Nalor kane ula pyntip ruh ba ia ka Shillong Cherry Blossom Festival 2025 yn pynlong ha ka 14-15 tarik u Naiwieng ia kaba yn wan ban pynshongshit da u Jason Derulo bad ka Kynhun tem kaba pawnam ha ri Bilat “The Script”.
Ban pynlong ia ki nongpeitkai ba kin sah jingkynmaw, yn sdang ruh ha ka sien kaba nyngkong eh ban sam da ki LED Wristbands ban deng ha ki kti bad yn pynshlur ban iaid da ka kjat naduh na Hotel Pinewood shaduh madan Polo yn sa pynbna ba kan dei tang ka jaka iaid kjat ha ka por ba pynlong ia katei ka tamasa. Ia kane ka rynsan yn pynlong biang ha Shillong, ha J.N. Stadium, ha kaba yn don shuh shuh ki Festival Zones ha MFA Ground bad SRGT Ground. U Bah Paul ula ong ba ha u snem 2024, ka sorkar jylla ka la bei T.23.5 Klur na ka bynta ki tamasa bapher bapher bad ka la lah ban pynmih haduh T.133.42 Klur kaba la jan 6 shah ia ka jingiohnong na ka jingbei bad ha kine ki tamasa la sakhi ia ka jingwan tuid haduh 3.86 lak ngut ki nongwankai, 60,000 tylli ki jingpynmih ha ki Social Media bad palat 20 Million ngut kiba la peitkai.
Ka jingmih na ka jingdie Tiket: T.29.1 Klur, ka jingkamai ki Hotel: T.33.8 Klur, naka leit ka wan, ka bam bad ka leit iew leit hat:T. 37.1 Klur, na ka F&B: T.6.9 Klur, ka jingpynlut ia ka tamasa: T.18 Klur bad ka jinglah ban aikam: 5,509 ngut kum kiba bylla sngi. Ula iathuh ruh ba tang lyngba ka liengsuin marwei kala ioh ia ka khajna kaba kot T. 16.8 Klur katba ka jingiohnong lyngba ka jingshakri ki kali ka long T.5.38 Klur.