Pynkhreh ka Sorkar ban tei 5 Star Luxury Resort ha Sohra bad Umiam

Ka Sorkar Jylla ka la rai ban tei 2 tylli ki 5 Star Luxury Resort, kawei ha Umiam Ri-bhoi District bad kawei ha Sohra East Khasi Hills, bad ka la rai ruh ban pynthymmai ia ka Polo Orchid Tura, West Garo Hills. Kane ka long kum shibynta ban pynbha ia ki jaka sah ki nongwan shangkai pyrthei khnang ban khring shuh shuh ia ki nongwan shangkai pyrthei hapoh ka Jylla. Ïa kane la pyntip da u Myntri ka tnat Tourism u Bah Paul Lyngdoh bad ula ïathuh ïa kane ka rai la shim ha ka jingïalang ba la khlieh da u Myntri Rangbah ka Jylla u Conrad K Sangma. Haba kren sha ki lad pathai khubor u Bah Paul ula ïathuh ka Sorkar ka la jam shakhmat ban pyntrei da ka PPP Mode ia ki project ban kyntiew ia ka kam jngohkai pyrthei hapoh ka Jylla.

U Paul ula ïathuh na ka bynta ka 5 Star Luxury Resort ha Sohra East Khasi Hills, ka Sorkar ka la dep ban ithuh ka jaka kaba marjan bad ka Jeeva Resort kaba dei ruh ka jaka jong ka tnat Tourism kaba heh 25 acres ha kaba la dep ban aiti ka jaka kaba 5 acres ban sdang pyntreikam noh mynta u snem. U Bah Paul u la ïathuh ba iaka 5 Star Luxury Resort ha Sohra yn pyntrei lyngba ka PPP Mode bad ka Hills and Canyon Hotels Private Limited kaba dei ka Company jong ka IHG Hotels & Resorts. Haba iadei bad ka 5 Star Luxury Resort ha Umiam, u Bah Paul u la ïathuh ba ka tnat Forests and Environment kala dep ban aiti iaka jaka kaba heh ym duna 300 acres shaka tnat Tourism. “Mynta ka kynti ka Sorkar kan tei ia ka 5 Star Luxury Resort ha Umiam ka ban iahap kyrdan bad kiwei ki Resort ha kylleng ka pyrthei” u la ong.U Bah Paul u la ïathuh ba ka tnat Tourism ka la ioh ruh ia ka dewlynnong (Island) kaba heh 36.78 acre ïa kaba la pyntreikam da ki riew shimet ha ki snem ba la dep bad mynta ka tnat Tourism kan sdang noh ban leh ia kaba donkam ban khot Tender ban sdang pyntrei noh ia ka Resort.

Haba iadei bad ka thaiñ Garo Hills, u Myntri ka tnat Tourism ula ïathuh ba ka tnat kan maramot bad pynthymmai noh ia ka Polo Orchid Hotel Tura da kaba pynbun kumba 100 tylli ki kamra ha kane ka Hotel khnang ban khring ia ki nongwan shangkai pyrthei sha kane ka thain. U Bah Paul u la ïathuh ba ïa kine ki Project jong ka tnat Tourism la kyrshan bad bei tyngka da ka Meghalaya Industrial and Investment Promotion Policy (MIIPP)  bad ka Northeast Industrial Policy (NIP). “Kine ki project kin iarap ia ka Meghalaya ban pynlong kum kawei ka Jylla hapoh ka ri kaba lah ban khring ia ki nongwan shangkai pyrthei na kylleng ka pyrthei baroh kawei” u la ong.