Mynta yn plie ka Myntri Sorkar Pdeng ia ka Polo Market, shen yn treikam ki Parking Lot ha Shillong

Ka Myntri ka tnat pla tyngka (Finance) ka Sorkar Pdeng ka Nirmala Sitharaman ka lah ban wan plie ia ka iew thymmai lane ka Polo Market ha nongbah Shillong haka 10 tarik Naitung. Ia kane la pyntip da u Symbud Myntri Rangbah ka Jylla u Bah Sniawbhalang Dhar uba khmih ruh ia ka tnat Urban Affairs. Haba kren sha ki lad pathai khubor u Bah Sniawbhalang ula iathuh ba ka jingpyntrei iaka Polo Market ba thymmai kynthup ka jaka ïeng kali kila dep bad naka liang ka Myntri Sorkar Pdeng ruh kala mynjur ban wan plie paidbah haka por 3:30 janmiet jong 10 tarik Naitung.

“Ngam pat lah ban pynthikna hynrei katkum ka jingiakren ka Myntri Sorkar Pdeng kala mynjur ban wan plie iaka Iew thymmai Polo Market” la ong u Bah Sniawbhalang. Haba iadei bad ka jingpynkhreh iaki jaka ïeng kali (Parking Lot) ha nongbah Shillong, u Symbud Myntri Rangbah u la ïathuh ba dang shen u la lum jingïalang bad ki ophisar ka tnat Urban Affairs bad la ioh jingtip ba shen, yn sa lah ban plie paidbah noh ïa baroh ki jaka ïeng kali, kiba lah ban pynieng kumba 1000 tylli ki kali man ka sngi.

U la ong ba baka Sorkar ka dang pynkhreh ruh ban shim rai halor ki Parking Lot, kiba la dep ithuh ha bun ki jaka kynthup ka jaka ba marjan ka Secretariat bad Motphran. Nalor kane u la ong ba ka jingpynkynriah ia ki dukan madan kala sdang mynta na Khyndailad, da ka jingthmu ban lah pyniaid beit iaid ryntih ia ki kali bad pynthikna ia ka iaid ka ieng ba kylluid ki paidbah.