Ka Lapangap kam dei ka jaka ia kajia pud, dang ïakren ki Committee ban pynbeit

U Symbud Myntri Rangbah ka Jylla u Sniawbhalang Dhar ula ong, ba ka shnong Lapangap, West Jaintia Hills kam dei ka shnong ba hap hapoh ka jingiakajia pud hapdeng jylla Assam bad Meghalaya. U Bah Sniawbhalang ula ong, ba ia ka shnong Lapangap la pynhap noh ha ka thup iakajia pud hadien ba la sdang ïakren pynbeit pud hapdeng ka Sorkar Meghalaya bad Assam.Haba kren sha ki lad pathai khubor u Bah Sniawbhalang ula ong ba ka jinglong jingman mynta hapoh ka thaiñ Lapangap ka la jai jai bad ki nongrep ki la ioh ban ot kba.

“Ka jingjia ia kynad ha Lapangap ka la la jai jai mynta bad la khmih lynti ba lashai la shisngi kin lah ban pyndep noh ia ka jingot kba, namar ba ki Sorkar jong baroh artylli ki Jylla ki la dep ban iakren halor ka jingpynneh ia ka suk ka sain̈ ha kane ka thain̈” la ong u Bah Sniawbhalang. U Symbud Myntri Rangbah ula pyntip na ka liang ka Sorkar ka la dep ban shna ia ka ktem pulit hapoh ka shnong Lapangap bad ki pulit ki don ha kane ka shnong ban pahara ia ki nongshong shnong. Ula ong ba ki Regional Committee jong baroh artylli ki Jylla ki la leh ia kaba donkam bad shen kin lah ban pynbeit noh halor ka jingiakjia ha ki thaiñ Lapangap, West Jaintia Hills.

Halor ka jinglong jingman ha kiwei ki jaka ba don ka jingiakajia, u Symbud Myntri Rangbah ula iathuh ha kaba iadei bad ka Khanduli-Psiar bad Block-I (kiba dei ki thup ba don jingiakajia), ka kaiphod la dep aiti bad ka don ki bym pat dep ruh bad ka jingpynkhreh ia ka kaiphod ka dang iaid halor kane ka kam.”La thaw ia ka Committee ban lah ban pynkhreh ia ka kaiphod katkum ka jinglong jingman, khnang ban ioh ban pynshong nongrim ia ka kaiphod ba ngi ioh” u la ong.