Lada ki bor shnong ki iatreilang bad ka sorkar kan ym don jingeh ban pynurlong ia ki thong: Conrad

U Myntri Rangbah ka jylla u Conrad K Sangma hynne ka sngi ula lum ia ka jingialang iasyllok bad ki Rangbah Shnong bad ki nongialam shnong ba hap hapoh ka Greater Shillong Planning Area ba la long ha State Convention Centre.Ha kane ka jingialang la wan iashim bynta u Symbud Myntri Rangbah ka jylla u Bah Sniawbhalang Dhar, u Chief Secretary u Dr. Shakil Ahammed, u Commissioner and Secretary Dr Vijay Kumar D ryngkat bad ki heh ophisar na ka tnad Urban Affairs, Shillong Municipal Board (SMB) bad ka Meghalaya Urban Development Authority (MUDA).U Myntri Rangbah ula ong ba ka jingthmu jong kane ka jingialang kam dei tang ban shu kdew ia kiei ki bym shym la treikam, hynrei ban kylli ia kaei kaba ki lah ban wanrah sha ka jingbha.“Lada ki bor shnong bad ka sorkar, ki ophisar bad ki nongialam seng sain pyrthei ki iatreilang kan ym don jingeh ban pynurlong ia ki thong,” la ong u Conrad bad ban jur ia ka jingdonkam ban iatreilang hapdeng ka sorkar bad ki bor shnong ban shimkhia ia ki jingeh ki paidbah ha ki jaka sor.

Ha katei ka jingialang, la plie ruh ia ka jingsdang ia ka Mission Clean Shillong 2027 kaba dei ka sienjam da ka jingthmu ban pynlong ia ka Shillong kum kawei na ki jaka kaba khuid bad ka nongbah kaba pynneh pynsah ha ka thain shatei lam mihngi bad kane ka mishon ka pynleit jingmut ban pynlong ia ki shnong kiba khuid, ban kynjoh ia ka 100 percent ia ka jingtylliat ia ki niut ki nier bad ia ki jaboh jabiañ, ban weng ia ki niut kiba la sahteng hapoh Marten bad ban sdang pyntreikam ia ka jingkhmih bniah da ka jingpyndonkam ia ki kor ki bor.Ban kyntiew ruh ia ki nongshong shnong ban ialam ia ki jingpynkhuid ia ki shnong bad ka jingdon ia ka jingkitkhlieh ha kaban iashimbynta ha kaban pynkhlain ia ka khuid ka suba.U Myntri Rangbah ula ong “Ngim lah ban long kiba biang pura lut hynrei ngi la pyrshang tyngeh pat, hynrei da ka jingtuklar lem ka jong phi, kiba bun kiei kiei kila sdang ban bha, naduh na ka jingdon ia ki jaka pynbiang ia ka umbam umdih, ki jaka bret niut, ka jingpynbiang ia ka bording elektrik bad ka rukom lum ia ki niut ki nier, hynrei ki dang bun pat kiei kiei kiba dang hap ban leh shuh shuh”.

Nalor kane ula pynshai ruh ia ki sienjam kiba la shim da ka sorkar, kaba kynthup ia ka jingpyndait ia ki CCTV, ka jingbuh ia ki post elektrik, ka jingpynkhuid ia ki nala bad ka jingpynitynnad ia ka nongbah.U Conrad ula kyntu ban don ia ka rukom treikam bad ka jingpynitynnad bad ka jingsumar sukher kan long ka kam kaba dei ban leh man la ka por bad kan ym dei shuh kaba shu leh tang shisien lano.Ula ong, ba yn sa pynlong biang ia ka jingiakren halor ki ar tylli ki mat kiba kongsan kaba kynthup ia ka jingpynkhuid ia ki wah bad ban iakhun pyrshah ia u droks ban pynthikna ba dei ban mih ka jingseisoh ha ki bnai ban wan bad ula ong ba ka long kaba donkam ban ia treilang kum ka kynhun ban pynlong ia ka Shillong kaba khuid, jyrngam bad ka nongbah kaba khie im bha.U Conrad ula pynbna ruh, ba ha ka wat kaba nyngkong jong ka jingpyndait ia ki CCTV kan kynthup ia ki 48 tylli ki shnong ha kaba yn pyndiat 250 tylli ki camera bad ia kane yn pyndep hapoh ka taiew ba kut jong u Naiwieng bad ka Shillong Municipal Board kan long kum ka kynhun kaban khmih bad sumar ia ki CCTV bad ia ki Street Light.