Plie u MR ia ka jingsdang pule Enjinering Kolej da 50 ngut ki samla pule

U Myntri Rangbah ka jylla u Conrad K Sangma ryngkat bad u Symbud Myntri Rangbah u Bah Prestone Tynsong hynne ka sngi ki la plie ia ka jingsdang ka samoi pule Enjinering Kolej ba nyngkong ha jylla ha Shillong Government College of Engineering ha Mawlai Kynton Massar, Shillong. Kane ka kolej ka la sdang ai jinghikai hadien ba ioh jingmynjur na ka All India Council for Technical Education (AICTE) bad yn sdang ia kane ka samoi pule da 50 ngut ki khynnah pule. Ha kane ka sngi la iadonlang ki Myntri Sorkar kynthup u Bah Lahkmen Rymbui, Bah Sanbor Shullai bad Timothy D Shira, u Chief Secretary ka jylla u Dr P Shakil Ahmmed, u MLA ka Mawlai u Bah Brighstarwell Marbaniang, ki nonghikai, samla pule bad kiwei kiwei.

Haba kren ha ka jingialang u Conrad Sangma ula ong ba kane ka sngi, ka dei ban sah kynmaw ha ka jylla ia ka jingsdang jong ka Government Engineering College ba nyngkong bad ula pynpaw ia ka jingsngewnguh ia baroh ba la synniang ban pynurlong ia kane ka project ba la angnud la slem bha. Ula pynpaw ruh ia ka jingkyrmen ba kane ka jaka pule kan saindur ia ka lawei jong ki samla pule bad ula ban jur ia ka jingkongsan ban pyndonkam bha ia ki kor teknoloji bad ia ka Artificial Intelligence (AI). Nalor kane ula iathuh ba ula don uwei u samla Khasi na Shillong uba la shna dalade hi ia ka Software kaba pyndonkam ha kaban pyn kynriah ia ka S/4HANA System ka iew pyrthei ba $10 billion- da kaba pynrung lang ia ka “Speed of Light” ban pynduna ia ka por leh test na ka shisnem tang da ki katto katne bnai.

U Conrad ula iathuh ruh ba ka bynta kaba ar jong ka Shillong IT park yn sa plie noh ha u Nohprah, ka ban don 3000 seat bad ka kompani na UK kala pynpaw ia ka jingkwah ban sdang ia ka jingtreikam wat hashuwa ban pyllait paidbah ia ka.