Maham ka JSU ia ka NFR ban Survey lynti Rel

Ka Jaintia Students’ Union (JSU) ka pynpaw ka jingpyrshah jur ia ka jingthmu jong ka North East Frontier Railway (NFR) ban pynlong jingjurip naka bynta ka jingthmu ban pyniasoh lynti Rel ha Jowai ha West Jaintia Hills district. Kane ka jingmaham ka JSU ka wan hadien ba ka Sorkar Pdeng ha ka jingtyrwa mang tyngka 2024–2025, ka la mynjur ban pynlong ia ki jingjurip na ka bynta ar tylli ki lynti rel ki ban pyniasoh iaka Jowai kata Jowai, Khliehriat & Chandranathpur Line (79 km) bad ka Chaparmukh & Jowai Line (180 km). Ka JSU ka la maham ia ka Sorkar ba kan nym pyrshang ban pynbor wanrah lynti rel khamtam ha ka jingbym don ki ain ba khlain ban iada ia ka hok jong ki riewlum bad khlem da pyntreikam iaka Inner Line Permit (ILP) ban khanglad ia ka jingwan buhai shnong beain ki bar Jylla.

“Ngi pyrshah ia ka lynti rel namar, wat haduh kine ki sngi, ym pat don ki ain kiba khlain bad kiba treikam bha ban pynbeit bad tehlakam ia ka jingwan rung beain ki briew sha ka Jylla jong ngi” la ong ka JSU. “Lada shah ia ka lynti rel ban rung shapoh ka thain Jaintia, ka jingma kaba khraw kan ap iaka thain baroh kawei”. Ka JSU ka sngewkhia ba ka jingpynpoi lynti rel khlem ki lad jingiada kiba biang katkum ka ain kan wanrah ia ka jingwan tuid jong ki briew kiba nabar, kaba buh jingma ia ka riti dustur bad ka rukom im jong ki nong shong shnong ka thain.

“Ngi la dep ban sakhi ia kaei kaba la jia ha Them Iew Mawlong bad ha ki jaka ba don ka jingjurip (Survey) ia ki jaka, ha kaba ki jingeh ki dang sah haduh mynta khlem da lah ban pynbeit haryngkat ka jingpynslem kaba iai bteng ban pynkynriah jaka” la ong ka JSU. Ka JSU ka la kyntu ia ka Sorkar ba kan buh hakhmat eh ia ka jingmyntoi jong ki paidbah trai shnong bad ban buh ia ki lad jingiada kiba donkam ban iada ia ka mariang bad ia ka hok jong ki riewlum shwa ban iaid shakhmat ia kino kino ki kam pynroi.