Buh Mawnongrim u Bah Sanbor ia ki projek shna surok ba T.3 klur

U MLA ka South Shillong uba dei ruh u Myntri sorkar jylla u bah Sanbor Shullai hynne ka sngi ula plie ia u maw nongrim na bynta ar tylli ki projek ban shna ia ka surok hapoh ka konstitwensi kiba la kot sha ka T.3 klur duna eiei. Ki ar tylli ki maw nongrim ba plie da u bah Sanbor, ki kynthup kawei ia ka surok na Madan Rit shaduh Umkynrut LP skul ha Riat Laban, Kynjat Phutbol ha ka jingmang pisa kaba T. 95.03 lak. Katba kawei pat ka dei ka surok na Madan Laban Laban Nepali School shaduh Seng Khasi Raid Laban Cultural Centre kaba la mang T. 1.85. Klur. Haba kren ha kane ka sngi, u bah Sanbor ula ong ba ki paidbah ha konstiwensi jong u kim donkam ban da leit ban iakhih shah thngan ha surok na bynta ban ioh surok, namar ka surok ka poi beit haduh ha kyrpong iing.

Ula pynkynmaw ia kawei ka longkmie na shnong Nongpoh, ka la hap ban mih madan marwei ban  dawa maramot ia ka surok namar ka jingsohsat ka jingsniew ka surok.“Ha kane ka konstiwensi pat ki paidbah ki shong ha jingthiah, ka surok ka la poi hi ha kyrpong iing, kim donkam ban leit shah thngan ha Secretariat,” ong u Sanbor.Ula ong ba u kwah ban pynsawa da ki kam bad ban pynduna da ki tyngam bad un iaid napoh napoh kum ka jhad duriaw ne ka submarine hynrei kan leh pat ia ki kam ba khraw. Ha kajuh ka por, ula kyntu ia ki nongshong shnong ba kin kynmaw ia ki jinghikai ki kot bakhuid ban ym shet kylla ia kiba leh bha.

U la ong ba ka jingduwai mynstep bad shwa ban thiah ia u Blei, ka dei ki dawai kiban ialam ia u ban long kumba u long mynta ban lah ban shakri ia ki paidbah. U la ong ba ynda la dep ban shna ia kine ki surok, ym tang ba kan pynsuk ia ka leit ka wan jong ki nongshong shnong hynrei kan pynlait ruh na ka jingeh jong ki briew khamtam kito kiba don iing kham pajih bad kiba pang ba shitom.