Kyrduh um ki ar shnong ba shah tuh haduh 27 tylli ki pipe um na ka skhim JJM

Ki kam tuh kam thiem ha Ri Bhoi District ka la nang bteng biang ha kaba ki runar bym lah ban ithuh durkhmat ki la law bad tuh syndon haduh 27 tylli ki pipe um ban pynpoi unbam ha ar tylli ki Shnong lyngba ka skhim Jal Jeevan Mission (JJM) kiba kynthup ia ka shnong Jorbil bad Umlangpur bad na kane ka jingshah tuh ki pipe um ka la wanrah ruh ia ka jingtyrkhong um ha kine ki ar tylli ki Shnong.

Katkum ka jingtip, ba la iohlum la ong, ba lyngba ka skhim JJM ki paidbah nongshong shnong jong ki ar tylli ki Shnong kila ioh jingkyrmen da kaba ioh ia ka umbam umdih hynrei phewse tang katto katne por ki paidbah kila mad pat ia ka jingkyrduh um tang na ka daw ka jingshah tuh ki pipe um.

La iathuh ruh, ba kane ka skhim JJM na bynta ka shnong Jorbil bad Umlangpur kadei kaba la mang ha ka dor kumba 3 Klur Tyngka hynrei kala wanrah pat ia ka jingduhnong kaba khraw ia kine ki ar tylli ki Shnong na ka jingdon jong ki runar kiba khlem pyrkhat ia ka jingmyntoi ki paidbah kiba la nud ban tuh haduh 27 tylli ki pipe kiba pynpoi um sha kine ki Shnong.

Shuh shuh ruh, na ka liang ki nongshong shnong hadien ba kila mad ia ka jingkyrduh um la katto katne sngi kila ujor sha ki nongialam Shnong kaba la pynlong ia ki nongialam Shnong ban leit jurip ia ki jaka ba ju pynpoi um hynrei kila lap pynban ba ki pipe um ki la shah tuh noh bad marmar la pyntip sha ki bor pulit ka Khanapara Police Station bad ujor ruh da ka ejehar bad ki pulit ki dang pynlong ia ka jingtohkit bad ban thwet ia kiba donkti.