Pynrem u MR ba shah pynïap u dkhot ka ACHIK

U Myntri Rangbah ka Jylla u Conrad K. Sangma, hynne ka sngi u la pynrem jur ia ka jingjia kaba sngewsih kaba la jia ha rilum Garo ha kaba uwei u samla ula khlad noh katba uwei pat ula mynsaw jur. Kane ka jingpynrem u Myntri Rangbah ka Jylla kadei halor ka jingjia kaba la jia ha ka Sngi Thohdieng ha kaba uwei u dkhot jong ka ACHIK u Dilseng M. Sangma ula khlad noh na ka jingshah thombor ha Goalgoan, West Garo Hills district.“Ngi pynrem ia kane ka jingjia bad ha kajuh ka por ngi phah ka jingsngewlem sha ki bahaiing bahasem kiba la duh noh ia la u baieid bathoin” la ong u Myntri Rangbah.

Ula iathuh ba ha ka miet jong ka sngi Thohdieng ki pulit jong ka West Garo Hills kila shimkhia mardor bad kila pynlong ia ka jingkhynra ha kylleng ki jaka bad kila iohkem ia 3 bad ki pulit kila trei khlem shongthait ban lap ia ki briew kiba la donkti ha katei ka kam runar. “Hynne ka sngi u Deputy Commissioner ula lum ia ka jingialang bad ki dkhot bapher bapher jong ka imlang sahlang ban thaw ia ka Peace Committee bad ban pynthikna ban iakren sani bha ia ki bynta kiba iadei bad katei ka jingjia. Nga kyntu ia ki nongshong shnong ka rilum Garo ba ngi dei ban pynthikna ba ka jingsuk bad ban ia imlang kadei ban iai bteng hapoh rilum Garo bad kin don bun ki khubor kiba lah ban pynsaphriang ha ki rynsan jong ka Social Media, sngewbha bishar bniah ia ki” la kyntu u Conrad Sangma.

“Ha kane ka khyllipmat, nga kwah ban pynthikna ia ki nongshong shnong ba ki pulit bad ki bor pyniaid District ki dang trei ia la ka bynta bad ngin pynthikna ba ki sienjam kiba tyngeh bad baroh ki briew kiba donkti ha kane ka kam runar kin shah pynshitom” la pynkut u Myntri Rangbah.