Pynduh noh ia ka mynsiem bishni haba kiew kiwei, kyntu u Dy CM

U symbud myntri  ryngbah ka sorkar Jylla u Sniawbhalang Dhar ryngkat u myntri ka tnat ka koit ka khiah bad sports u Wailadmiki Shylla, mynta ka sngi ki la plie ia ka jaka shna trok bad bus ka company Tata Motors ne  ka  TATA Authorised Service Station kaba don ha Khliehtyrshi, West Jaintia Hills District harud surok Jowai bypass. Kane ka TATA Servicing Station dei kaba heh duh ha Rilum Jaiñtia kaba la biang lut ki tiar katkum ka juk ba mynta bad dei ruh kaba heh duh ha ka thaiñ North East bad ia kane ka Station la long trai da u Nidamon Chullet uba la long ruh kum u Managing Director jong ka.Ha kane ka sngi la donlang ruh u Commingone Ymbon myntri barim ka sorkar jylla uba dei u MLA ka Raliang, ki MDC ka  JHADC, kiba mihkhmat na ka company Tata Motors, ki Dolloi bad kiwei ba shah khot sngewbha.

U Wailadmiki Shylla haba kren kum u symbud kongsan ha kane ka sngi u pynpaw ka jingsngew sarong halor ka jinglah ban plie ia kane ka TATA Authorised Service Station ha Rilum Jaintia khamtam ba kane ka shnong ka dang hap haka Constituency jong u. U bynrap ruh ba niar ban don ki briew naka thain ba lah ban sdang kum kane ka kam watla ka sorkar jylla ka pynshlur ban sdang seng kam.Bad ka jingsdang kum kane ka kam ka iarap ruh ban ai kam ai jam iaki khun samla ha kane ka juk kyrduh kam. U kongsan Sniawbhalang Dhar haba iaroh ia ka jingshlur u bah Nidamon ban sdang ia kane ka kam  u ong, bun sien hi ngi juh Pyrkhat shwa ban sdang ia ka kam donkam ban don ia ka kyrdan, hynrei mynta ka sngi pat la sakhi ba ym donkam kyrdan lyngba ka jingshim u bah Nidamon Chullet ia kane ka sienjam.

U bynrap ruh ba shisien ba la don ka mynsien ialeh, kano kano ka kam ba thmu ka long jop beit, ha kaba ula pynkynmaw ruh ia ka por ba ma u bad u hynmen jong u ki sdang ia ka Dhar Construction ba watla hapdeng ka jingshah kren bein bad mad bun ki jingeh hynrei ki jop pat dei namar ba ki don ka mynsiem ialeh. Nangta haba kyntu iaki trai kali ban wan phah shna kali ha kane ka jaka namar ka pynsuk shibun ia ki khlem da donkam leit shuh sha jngai, u kyntu ruh ia ki paidbah ban pynduh pyndam ia ka mynsiem adnud bishni haba kiwei ki kiew, hynrei dei ban ai mynsiem namar ka jjngkiew jong ki ruh dei na ka jingtrei shitom.