Ïakhih ka RBDCC pyrshah ïa ka skhim bylla 125 sngi ka BJP

Ban bteng ka jingpyrshah ia ka jingleh donbor jong ka party Bharatiya Janata Party (BJP) ban pynkylla ia ka skhim 100 sngi lane ka MGNREGA sha ka Viksit Bharat Guarantee for Rozgar and Ajeevika Mission (Gramin) VB-G- RAM G Act 2025, ki nongialam ka Ri Bhoi District Congress Committee (RBDCC) ki la mih ban pynlong ia ka jingiakhih kaba jai jai hakhmat ka Indoor Stadium hajan ka ophis u Deputy Commisioner Ri Bhoi District.

La sakhi ha kane ka jingiakhih ka RBDCC la lamkhmat da u Bah Rocky Marwein kum u President nalor ka jingiashim bynta ruh da ki phew ngut ki nongkitkam kiba la rah da ki poster ba la thoh ia ki kyntien pynrem ia ka jingleh donbor jong ka party BJP bad ban dawa pynneh ia ka skhim MGREGA kaba la thaw naduh u snem 2005.

Haba kren bad ki Nongthoh Khubor, u Bah Rocky Marwein u la iathuh, ba ka party Congress kaba dang bteng ban ieng pyrshah ia ka jingleh donbor jong ka party BJP da kaba pynkylla ia ka skhim bylla 100 sngi ka MGNREGA sha ka Viksit Bharat Guarantee for Rozgar and Ajeevika Mission (Gramin) lane ka VB-G- RAM G Act 2025, la pynlong ha kylla ki jaka jong ka jylla Meghalaya bad kiwei kiwei ki jylla.

U la ong ruh, ba ka jingpyrshah jong ka seng Congress ia ka jingleh donbor jong ka BJP ka long ba kane ka skhim thymmai ka la ktah shikatdei ia ki nongshong shnong bad ki nongbylla sngi khamtam ka bor treikam jong ki Village Employment Council, kaba la wanrah jingiapher shikatdei eh na kaba la pyniaid la 20 snem katba dang synshar ka Congress bad kane ka jingkylla ha ka jingpyntreikam jong ka MGNREGA ka la wan hadien ba la synshar ka BJP naduh u snem 2014.

“Ka BJP ka la pyrshang ban pynthame ia ki nongshong shnong da kaba bynrap ia kane ka skhim thymmai na ka 100 sha ka 125 sngi, haba wat ia ka 100 sngi ruh bun ki Shnong kim lah ban pyndep lut bun ki Shnong ki dep tang 60 ne 70 sngi ha ka shisnem kumno yn lah ban trei 125 sngi, wat ka jingsiew bai bylla bai tiar ruh mynta bun ki Shnong kim ioh shuh ha ka por kaba biang kaba la buh jingeh shikatdei ia ki Shnong ki thaw ban pyntreikam ia ki kam pynroi”, ong u Bah Rocky Marwein da kaba bynrap ba ki paidbah kim dei ban shah ialam bakla ha ka BJP, na ka liang kan nang bteng beit ia ki jingiakhih na bynta u paidbah.

Ha kane ka sngi hadien ka jingiakhih kaba jai jai, ki nongialam ka RBDCC ki la leit ban iakynduh ruh ia u Deputy Commisioner ka Ri Bhoi District u Abhilash Baranwal ban aiti ruh da ka dorkhas halor ki mat jingiakhih bad ki jingdawa ban pynsngew sha ka sorkar pdeng.