Ai khublei bad pynkup burom ka KSU ia u DC Ri-Bhoi

Da ka jingsngewkmen halor ki jingsdang ban urlong ki mat jingdawa kaba ia dei bad ka jingshngain ka iaid ka ieng ki nongleit nongwan ha Surok Bah National Highway 06, mynta ka sngi ki nongialam ka Khasi Student’s Union, North Khasi Hills District ki la leit ban ai khublei bad pynkup burom ia u Deputy Commissioner ka Ri Bhoi u Abhilash Baranwal bad ruh ban kitbok kitrwiang ia u ha shwa ba un mih noh na ka district.

Ha ka jingleit ban ia kynduh bad ban pyndon burom ia u DC, na ka liang ka KSU la ialam da u Bah Ferdynald Kharkamni, President ha ka jingiadonlang u Samla James Hitler Mawphniang, Secretary lem bad ki dkhot ha kaba la ai sngewbha da ka jain ryndia bad ruh ia ka momento kum ka dak ban ai khublei bad ban kitbok ia u Abhilash Baranwal u DC ban sa leit shimti pat ia ka kam kum u DC ka East Khasi Hills district.

Haba kren sha ki Nongthoh Khubor, u Bah Ferdynald Kharkamni ula ong, ba kum ka seng hi ka dap da ka jingsngewkmen bad ka jingsngewnguh ia u DC ka Ri Bhoi District uba la lah ban shimkhia ban sdang pynurlong ia ki mat jingdawa ka seng mynta la bun snem ha kaba ia dei bad ka jingshngain ka leit ka wan jong ki paidbah lyngba u surok bah National Highway 06 da kaba u la tuklar mardor bad ki bor ka National Highway Authority of India (NHAI).

U la iathuh ruh, ba haduh mynta ki mat jingdawa jong ka seng, lyngba ki jingtrei ba la sdang ka la kot kumba 40 persen kiba kynthup naduh ka jingdonkam ban pynieng ia ki street light ban ioh jingshai ha u surok bah ha kaba ka kam ka la iaid shaid shaid naduh Jorabat terter shaduh Umiam bad la ai jingmut ruh ia u DC ba ia ka bai pyndonkam bording ilektrik dei hi ban bei da ka NHAI katkum ka soskular ba la ia soi na bynta 20 snem.

U Bah Kharkamni, u la pynpaw ruh, ba na ka liang ka seng ka la rah ia ka mat halor ka jingshngain ka iaid jong ki paidbah khamtam ki khynnah skul ban jam na shilliang sha shilliang u surok bah da kaba donkam ban tei ia ki foot overbridge kumba ar tylli ha Nongpoh, Byrnihat, Umsning bad Mawlein Mawkhan bad ia kane da ka jingshimkhia u DC, ki kam ki la sdang ban iaid shakhmat lyngba ka jingtei ia ki paia cement kaba la sdang na Umsning Lumumpih.

Nalor kine ki mat jingdawa, u Bah Kharkamni u la iathuh, ba ka KSU ka la pynsngew ruh halor ka jingdonkam ban maramot ia ki bynta jong u surok bah National Highway 06 naduh Umiam shaduh Jorabat ha kaba na ka liang u DC u la bthah ia ki bor ka NHAI ban shimkhia bad ia ka jingmaramot ia kito ki bynta ba sniew la lah ban pyndep lut baroh, watla ki dang don ki mat jingdawa kiba dang sahteng ia kine kum ki nongialam kin nang buddien bad u DC ba thymmai ban sa wan shimti shen ha Ri Bhoi District.

Shuh shuh ruh, na ka liang ka KSU North Khasi Hills District ka la ai khublei kyrpang ia ka jinglong kaba la kloi jong u Abhilash Baranwal, IAS kum u Deputy Commissioner ka Ri Bhoi District ban shimkhia ia ki mat jingdawa jong ka seng na bynta ka bit ka biang bad ka jingshngain jong ki paidbah nongleit nongwan lyngba u surok bah NH 06, ha kaba kum ka seng ka la ai ka jingkitbok kitrwiang ia u na bynta ki kam ba un sa shimti pat kum u DC sha kawei pat ka district ka jylla.