Ka Sohra ka dei u Syntiew ka Ri Khasi ha ki kam jngoh kai pyrthei:Dr DRL Nonglait

Ka nongialam ka NPP Women Wing kaba dei ruh ka MDC ka Nongshken, ka kong Grace Mary Kharpuri ka la ong ba ka elekshon MP ha 2024, u paidbah ula shah ialam bakla da ka jingpynthame ia ki paidbah haduh ba kim sngewthuh ia ka rukom jied nongmihkhmat.

Haba kren ha ka jingialang na ka bynta u kyrtong MP ka NPP u Dr. DRL Nonglait hynne ka sngi ha Mawkdok, ka kong Grace ka la kam ba ha ka elekshon MP ha 2024, ki paidbah ka Khasi-Jaintia ki la shah pynthame ha ka social media.

Ka la kam ba ha kine ki sngi, ka sain pyrthei ka la hiar dor ha kaba ki briew ki jied nongmihkhmat da kaba shu shah pynthame, ym da ka jingstad bad jingshemphang.

Kala kam ruh ba ka synshar khadar ka la I hiar dor ha kaba la shu kynthoh briew ne ia ka sorkar khlem da bishar ia ki kam bad ka la kyntu ia ki paidbah ka Sohra konstitwensi ban bishar bniah ym ban shah pynthame ha ki briew kiba shu kynthoh bad kren pyrshah khlem nongrim.

U MLA ka Sohra u bah Gavin Miguel Mylliem ula ong ba ka sorkar MDA ka la dap phra snem kynthih bad ha kine ki phra snem, ki kam ba radbah ka leh ia ka jylla ban kyntiew ia ka ioh ka kot, ka pule puthi, ka lynti syngkieng, ka um bam um dih, ka koi ka khiah bad kiwei kiwei.

Ula ong ba ka sorkar ka la leh shibun ruh ban kyntiew ia ka kam jngohkai ha ka jylla bad ha ka thain Sohra ban kyntiew ia ki nongshong shnong.

U bah Gavin ula ong ba ki spah klur, ki hajar klur kin long leh noh ei lada kim ai jingmyntoi ia ka jingim jong ki paidbah.

U MLA ka Sohra ula ong ba u snem 2024, ki paidbah kila ioh sngew ia ka jingpynsngew ka jingpyni jong ki seng sain pyrthei bapher bapher ha kaba ha ka MP ka party VPP ka la jop hynrei mynta mynta u snem 2026, ka VPP ruh ka la ioh ban bat ia ka jingsynshar ha KHADC bad ki paidbah kila ioh ban bishar ia ki kam jongka.

U la ong ba ban bishar ka long kaba suk hynrei ban synshar kam long kaba suk bad kiba don ha ka liangpyrshah ki suk ban shu kynnoh ia ka sorkar.

Katba u kyrtong MP ka NPP u Dr. DRL Nonglait, u la ong ba ka longbriew manbriew ka la hiar dor hiar arsut ha kine ki sngi bad ka akor Sohra kaba ju pawnam hynrei mynta haba peit ha Social Media, ym don akor ym burom shuh.

U Dr. DRL Nonglait ula pynpaw ia ka jingsngew bynniaw ia ka jinghiar dor ka akor ka burom, ka ktien ka thylliej ha kine ki sngi khamtam ha ki rynsan social media ha kaba la mih tang ki ktien khlem akor.

U la ong ba ka ktien ka thylliej ka la shu pathar ha social media da ki kyntien khlem akor bad jah burom bad kane ka la pyni ba ka longbriew manbriew ka la dum ka la synia.

Ha kajuh ka por, ula ong ba ka Sohra konstitwensi ka dei u syntiew ba itynnad tam jong ka ri Khasi bad ka dei ka jaka jngohkai kaba nyngkong tam kaba la tip shaphang ka ri Khasi bad yn sa nang kyntiew shuh shuh.

“Ka kam jngohkai ka Sohra, ka la ai kam ym tang ia ki briew ka Sohra hynrei na kylleng ki jaka, ki la ioh kam ioh kamai.

Ula pynkynmaw ia ka kyntien u Soso Tham, kaba ong, nang shai namarkata, ngin nang kham im hok,” ula ong.

Na ka liang u Working President ka NPP bah Hamletson Dohling ula kam ba ki don bun ki nongialam na kiwei kiwei ki seng sain pyrthei ha ka jylla kiba la wan ban iasoh ban ai jingkyrshan ia u kyrtong MP ka NPP u Dr. DRL Nonglait.

U la ong ba ka jingmih ka kyrteng jong u Dr. DRL Nonglait ka la ktik ia kiba bun ki riew rangbah, ki nongialam bad ki samla ban wan kyrshan ia ka NPP namar ba kila sngewthuh ba kam long ban leh shongshit ha kapor elekshon kam long satia.

U bah Hamlet ula ong ba um dei tang u doktor kot ialade hynrei na ka jabieng jongu, u la pynmih shibun ki doktor na NEHU.

Ha kajuh ka por, ula iaroh ia u MLA ka Sohra bah Gavin Miguel Mylliem ba u dei u MLA uba tbit bad ba jai jai bad shisien ka sngi, un long u nongialam ha ka jylla.

U la ong ba u bah Gavin um pat ju pynlehrain ia ka Sohra hynrei u aiti met bad mynsiem ban trei na ka bynta ka bha ka miat jong ki paidbah.