Mynjur ka sorkar ban pyndait ‘Name Board’ ha ki kali sorkar

U Myntri Rangbah ka Jylla Conrad K Sangma ula pyntip ka Sorkar Jylla ka mynjur ia ka thup ba la pynbeit ryntih na bynta ban pyndait ‘Name Plate’ ne ‘Name Board’ ha ki kali Sorkar kum shibynta na ka jingialeh pyrshah ia ka VIP Culture. Haba kren sha ki lad pathai khubor u Conrad ula ong baka dei shi bynta jong ka sienjam ka Sorkar ban ialeh pyrshah ia ka kolshor ka jingleh ba heh ne sngew heh sngewhain. “Ka jingpynbna kaba ar ka dei ka jingpynbna ba suk bha, ka dei ka jingteh kyndon ia ka jingpyndonkam ia ki Name Board ha ki kali Sorkar” la ong u Conrad. “Lada phi kynmaw, ngi lah wanrah ia ka SOP ha kaba ngi la kren halor ki siren bapher bapher, ki jingpyndait light bad kiwei kiwei kiba ngi sngewkhia bha haduh katta katta” ula ong.

U iathuh ba ka Tnad Transport ka la dep shim rai ia kiei kiba lah ban pyndait ia ki name board bad kumno ki dei ban paw ha ki kali. “Ka Tnad Transport kan sa batai ba ianp la shah ban pyndonkam ia ki name board bad ka Tnad mynta ka sngi kala aiti ia ka thup ki briew, ban ia ka kyrdan, kiba lah ban pyndait ia ki name board bad kumno ka dei ban long kane ka name board” ong u Conrad. U Myntri Rangbah u pyntip ba kane ka thup bala ai jingmynjur ka kyntnup ia ki tnad bapher bapher jong ka Sorkar ba kynthup ia ki Heh Ophisar kiba bat ia ki kyrdan bapher bapher ha ka Sorkar, bad ki Iingkashari bad ki kyrdan bala ithuh da ki ain na ka Sorkar Pdeng. Nalor kane ka kynhun Myntri Sorkar kala ai jingmynjur ia ka amendment jong ka Meghalaya Forest Authority Act, 1991, ban shah ia ka Meghalaya Forest Authority ba kan pyndonkam ia ka song pisa ba ai ka Sorkar.

Ia ka Forest Authority Act la mynjur ha u snem 1991 bad mynta kala don la 35 snem hynrei ym shym la lah ban pyntrei ia kane ka Act kumba ka long. U Conrad ula ong ba ka Amendment kan shah ia ka MFA ba kan don ia ka kyndon ba kan lah pyndonkam ia ka song pisa ba la ai da ka Sorkar Jylla haba ka leh ia kano kano ka kam ba man la ka sngi kum ka jingialang hapdeng ka Tnad Forest bad ki District Council bad ka Sorkar Jylla ruh kumjuh” ula ong.