Ba tieng shah pynkylla niam Khristan, phet shnong ki longïing na Amring

Ka khubor ka iathuh katto katne ki longiing na ka shnong Amring ba don ha khappud Meghalaya-Assam ki la mih noh ban leit shong shnong shawei ha Narlong hajan ka shnong Umsaliang, Ri Bhoi District, namar ki jingsheptieng ba ioh kitei ki longiing ki shah pynkylla sha ka niam Khristan hadien ba bun ki longiing ha ka shnong kiba bat ia ka niam tynrai ki la kylla noh sha ka niam khristan. La iathuh kane ka la jia shiphew snem mynshwa ba ki nongshong shnong ha Amring kiba dei na jaidbynriew karbi ha la kylla khristan ia lade. Kumta ki longiing ba dang bat dang ksoh ia ka niam tynrai ki la mih noh bad leit thaw shnong thymmai ha Narlong ha khappud Meghalaya-Assam namar ka jingsngewthuh bakla ba ioh ki shah pynkylla niam khristan lada ki sah ha katei ka shnong bad katei ka shnong thymmai ba la tip kum ka Narlong kiba dang bat ia ka niam tynrai ki mynta kumba 20 tnum iing.

La iathuh wat haduh mynta kitei ki longiing ki dang don rukom pyrkhat bad sngewthuh bakla ba lada ki don ha Meghalaya kin shah pynkylla niam kumta ki kwah ban don hapoh Assam.Ha kane ka shnong la lap ka sorkar Assam ka la shna ia surok iaid kali da ki mawit naduh Rani-Narlong haduh Damuhapham  kaba long kum ka Border Road ban suk ki paidbah ka thain bad ka sorkar Assam ka shna ruh ia ka Aganwadi centre kaba dang iaid mynta. Kaba lyngngoh ka long ha katei ka shnong kynthup 10 tylli ki shnong ha ka thain kiba don ha khappud Meghalaya- Assam ki paidbah ki don epic ne dur thep vote ar tylli, kata ha Meghalaya bad ha Assam bad ki ioh ruh ia ki jingmyntoi na baroh ar tylli ki jylla.

Kumba ban pynpaw ki nongshong shnong ha kane ka thain ki dei ki jaidbynriew karbi ba kynthup 10 ki shnong ha khappud Meghalaya-Assam, kumta ki nongshong shnong ki don ar tylli ki epic ne dur thep vote ha Meghalaya bad Assam bad kane ka jinglong jingman ki briew ha thain khappud ban bat ar tylli ki epic ka wanrah ka jingeh bad ka jingkulmar ha ka synshar khadar ia ki bor sorkar ban pyntrei ia ki skhim pynroi. Kane ka lah ban long ha ka jingbym sngewthuh bad shah ialam bakla ki nongshong shnong ne ka lah ban long ka jingshim kabu ki nongialam shnong ban ioh myntoi na Meghalaya bad Assam.