Bishar bniah u MR bad ki Myntri ïa ki projek hapoh Tura

U Myntri Rangbah ka Jylla u Conrad K Sangma, hynne ka sngi ula lum ia ka jingialang ban bishar bniah ia ki jingpyntrei ia ki projek kam pynroi hapoh Tura.Ha kane ka jingialang la iadonlang ki Myntri Sorkar kiba kynthup ia u Myntri ka kam jngohkai pyrthei u Timothy D. Shira bad u Myntri uba khmih ia ka tnad Arts and Culture u Bah Sanbor Shullai bad kiwei kiwei ki heh ophisar ka jylla.Ka jingialang kala shong bishar ia ka jingiaid ki project ba dang don hapdeng ka jingpyntrei bad la iakren ruh ia ki jingthmu na ka bynta ki kam ban wan, ki ban sa pyntrei ha ki wat bapher bapher.La bishar bniah ia ki project kiba dang iaid ha ka jingkynshew pisa baroh lang kaba kot T.1331 Klur kiba kynthup ia ka Tura Integrated Administrative Complex (T.165 klur) ia kaba la khmih lynti ban pyndep da ki bynta bynta, kaban sdang naduh u Nailur 2027, ka PA Sangma Sports Complex bad ka West Stand, ka Pa Togan Sangma Track & Field Stadium bad ka Tura Technology Park.

Ki project kiba dang iaid shakhmat ki kynthup ban pynitynnad ia ka Tura Bazaar, ka jingtei ia ka Convention Centre, Pelga Tourist Circuit & Hospitality Complex, Working Women’s Hostel, ka jingshna ia ka Heliport bad ka Tura Water Supply Scheme bad ka jingpyntrei thymmai ia ka Polo Orchid Hotel la khmih lynti ba kan sa sdang noh shen.Nalor kane la khmih bniah ruh ia ki project ba shongdor T.242.74 klur kiba la pynkhreh ban khot tender bad ia kine yn sa pyntrei da ki bynta bynta bad ki kynthup ia ka jingpyntrei thymmai ia ka Najing Bazaar, ka Multi-level Parking bad Cinema Complex ha SMELC, Tura City Park, ka Active Ageing Centre, ka Kid Zone ha Araimile bad ka Tura Promenade.Kiwei pat ki project kiba thmu ban pyntrei ki kynthup ia ka Chief Minister’s Youth Centre, ban shna pynbha ia ka Circuit House, Commercial Complex, ka jingpyndait ia ki Street Light, ka jingpynroi ia ki jaka ialehkai ha Kendriya Vidyalaya.

Katba ki project kiba dang don ha ka jingpyrkhat, kiba la mang T.155 klur, ki kynthup ïa ki ïingsah kiba jem dor, ka archery complex bad kiwei pat ki jingtei kiba iadei bad ka kam khaii pateng.Ka jingkynshew kyllum kaba thmu na ka bynta ka jingpyntrei thymmai iaka Tura ka long kumba T.1928 klur. U Myntri Rangbah u Conrad Sangma ula banjur ia ka jingdonkam ban pyndep hapoh ka por kaba biang ia ki projek bad ka jingiatreilang ba kham bha hapdeng ki Tnad Sorkar.