Bitar ki MDC liang pyrshah shwa ban sdang ka dorbar

Ka Dorbar Tlang ba shisngi jong ka JHADC kala long mynta ka sngi 20/11/2025 bad shwa ban sdang iaka dorbar lyngba ka kynta kylli jingkylli u nongialam ka liang pyrshah u Awhai Andrew Shullai ula ieng nyngkong ban pyrshah iaka jingpynlong dorbar ba tang shisngi da kaba ong ba kim iohlad ban kylli ia baroh  ki jingkylli kumba la buh haka kynta kylli jingkylli bad jubab. Nangta u MDC na Mukhla Ummulong u Nehemaia Lamare ruh ula ieng ban pan jingshai halor ka jingbympaw ka jingkylli jong u ha kane ka sien ba ar kaba ula dep kylli  haka Dorbar Lyiur bala dep kaba dei kajuh ka jingkylli.

Kiwei pat ki MDC liang pyrshah khamtam  jong ka VPP kila ieng ban pynpaw halor ka jingbymhun iaka jinglyngkot ka por kylli jingkylli. U Jamshaphrang Pohtam MDC War Central  lei ula pynpaw ka jingbitar da kaba ong   ymdei ban iaid shakhmat iaka dorbar lada ymlah ban pynshai bad ong ruh ka  rukom pynlong dorbar dei kaba la shim sting bha khlem don jingkitkhkieh naka bynta ban iatai iaka bha ka miat. Bad kum ka dak ban pyrshah iaka rukom pyniaid dorbar hapoh ka council, u Jamshaphrang ula kyntait ruh ban  shim bynta ha ka kynta kylli jingkylli.

U MDC ka Congress na Saphai Sahsniang, u Rikut Parien ruh u phylla ban iohi  ba  bunsien ki  jingkylli ki MDC ki shah kyntait ne ki bym shem la pdiang da kaba ong dei ki bym shai. Naka liang u Chairman ka Council, u Dr. Sankey Shangpung ula pynshai ba ka kamram jong u dei ban bud iaki kyndon pyniaid dorbar ym ban pynshai lut ia baroh. Hadien kane ka kynta kylli jingkylli kala iaid beit bad sdang da u MDC ka Amwi Khliehtyrshi u Madonbai Rymbai.