Ha shrip ki pulit ngat ki 11 ngut ki nong Bangladesh ha ryngkat u snar nong pynrung tuh sha India

Ki bor pulit ka Ri Bhoi District mynta ka sngi ki la ioh ban kem noh haduh 12 ngut ki nong Bangladesh bad kynthup ia u wei u briew u ba donkti ban pynrung pynmih tuh ia ki nong Bangladesh shapoh India lyngba ki surok Indo-Bangladesh ba la tip kyrteng kum u Sukur Janab Shaikh, ia kine ki nong Bangladesh la ioh ban kem ha ka jingpynap shrip kaba la pynlong ha Byrnihat. Haba pyntip sha ki Nongthoh Khubor, u V.S Rathore, Superintendent of Police ka Ri Bhoi District, u la iathuh, ba ki pulit hadien ka jingioh jingtip halor ka jingthmu iaid lynti u tei u Sukur Janab Shaikh lem bad ki nong Bangladesh lyngba kawei ka train kaba don ia u number 15945 (LTT Dibrugarh Station) ha Kamakhya Station, Assam kaba wan na Mumbai sha Guwahati, ki pulit ka Ri Bhoi District ki la leit ban khynra ia katei ka train hynrei kim shem la lap satia ia kine ki nong Bangladesh.

U la iathuh ruh, ba dei hadien ka jingpyrshang ban buddien kaba tikna, ki pulit ki la pynap shrip noh ha Byrnihat bad hadien katto katne por ki la ioh ban bat ia kawei ka sumo kaba don ia u number AS 01 EC 3528 bad iohkem ia ki 11 ngut ki nong Bangladesh katba ia u Sukur Janab Shaikh pat kim shem la ioh bat satia, hynrei hadien ka jingiatreilang bad ki pulit ka Assam la iohkem noh ia u tei u Sheikh na Nalbari Assam ha kajuh hi ka sngi. Kitei ki nong Bangladesh kiba la iohkem lem la tip kyrteng kum ka Kakali Sardar (36), ka Hirina Dili Mulla (30), ka Unjilla Sadar (32), ka Rabia Begum (37), ka Panna Kamal Hussain (42), ka Poppy Hasu Mollah (26), ka Sonia Shaikh (24), ka Sobha Islam (28), u Saja Uddin Sk (26), kynthup ar ngut ki khynnah rit kiba dang thmu ban leit sha Bangladesh lyngba ka surok na Dawki (International Border) dang step phyrngap.

Hadien ba la kem ia kine ki nong Bangladesh la rah noh sha Nongpoh Police Station bad la pynngat kyndon katkum ka mukotduma 42(03)2025 U/S 61(2)/319(2)/336(3)/ 340(2)/152/212(b) BNS R/W sec 14(c)/14A(b)/14C Foreigner Act