Ka Dorbar Iktiar Paidbah kam dei ka kam politik, ong u Bah Pyniaid

U Chief Executive Member (CEM) ka KHADC u bah Pyniaid Sing Syiem ula kyntait halor ka jingkynnoh ba ka jingialang Dorbar Iktiar Paidbah, ka long na bynta ka jingmyntoi ha ka sain pyrthei. U bah Pyniaid haba kren sha ki lad pathai khubor, ula ong ba ka jingialang Dorbar Iktiar Paidbah ba la khot da ka KHADC ha ka sngi Saitjain ha Polo, ka dei ka jingialang ban sah jingkynmaw na ka bynta ka jaitbynriew bad kam don bynta eiei ban leh politik.

“Kane ka jingkynnoh ka long kaba bakla namar lada dei kumta nga tharai u Lat ka Jylla ruh un ym wan ban don bynta ha kane ka jingialang,” ong u bah Pyniaid bad bynrap “Ha kane ka jingialang ngi la khot lut ia ki nongialam ha ki seng sain pyrthei bad ki sengbhalang bad ban ong ka dei ka kam sain pyrthei ngam tharai ba kan dei ka kam politic kin ym wan .Kane ka dei ka kam jaitbynriew bad kan bha ban buh shwa sharud ia ka kam sain pyrthei.”

Ula ong ba kane ka jingialang la tip kum ka Dorbar Iktiar Paidbah namar hadien 72 snem ba la don ia ka District Council, ki ain ban ithuh ia ka khyndew ka shyiap, ka jingtrei kam ki Seng Samla Sengkynthei ki Rangbah shnong bad ki sengkur, dang ioh mynta.U CEM ula ong ba ka Khasi Hill Autonomous District (Administration of Elaka) Amendment Act 2023 bad ka Khasi Hill Autonomous District (Khasi Social Custom of Linage) Amendment Act 2023, ki dei ki ar tylli ki ain ki ban pynkupbor ia ki seng samla , ki seng kynthei, seng longkmie bad bun ki sengkur ki dorbar kur ruh la ioh ia ka jingithuh.