Skhem u Bah Pius ban jop biang ha ka ilekshon MDC

U MLA ka Ranikor uba dei ruh u MDC ka Langrin Constituency, u bah Pius Marwein u la pynpaw ia ka jingsngewskhem ban jop biang sa shisien ha kane ka ilekshon kaban sa wan sha Iingdorbar Thawain ka Khasi Hills Autonomous District Council napoh ka Langrin Constituency. Haba kren bad ki lad pathai khubor hadien ba la pynskhem ia ki nongkitkam jong ka UDP Nongnah Zone, ka UDP Women’s Wing Nongnah Zone bad ka UDP Youth Wing Nongnah Zone ha ka jingialang kaba la long ha Nongnah dang shen, u Bah Pius u la ong ba haduh mynta ym pat don uwei ruh hapdeng ki nongialam ka UDP hapoh ka Constituency kiba la kynriah noh sha kiwei pat ki seng sain pyrthei, hynrei da ki spah ngut ki nongkyrshan na kiwei pat ki party ki la pynïasoh sha ka UDP.

“Hadien ba nga la leit ban jngoh ïa baroh ki unit jong ka seng ha ki dong bapher bapher jong ka Constituency, nga la ïohi ba ki nongkyrshan ki dang don ka jingshaniah ha nga kum u nongïalam, bad da ka jingwan pynïasoh jong ki nongkyrshan na kiwei pat ki seng saiñpyrthei, nga don ka jingkyrmen kaba skhem khlem artatien ba ngan jop biang ha kane kailekshon,” ong u Bah Pius.U bah Pius u la pyntip ruh ba kam dei ka rai jong u ban iakhun biang ha kane ka elekshon MDC ban wan, hynrei dei ka UDP Ranikor Circle ha ka jingialang bah kaba la rai da kawei ka sur ba u dei ban iakhun biang sa mynta ka kynti, bad kumta u la hap ban pynkohnguh bad pdiang ia ka jingangnud u paitbah.

Ha kawei pat ka liang u Bah Pius u la pynpaw ia ka jingkmen kaba khraw hadien ba u la iohi ia ka jingskhem jong ki nongialam bad ki nongkyrshan ka party, kibym shym la khih khohreh ne ngop ha ki jingpynsngewthuh bakla jong kiwei pat ki party.