“Ka Wangala Festival ba 1000 Drum ban ioh Guinness World Record”

U Myntri ka tnat Tourism u Timothy D Shira, ula pyntip ka Wangala Festival ba 1000 Drums kan long ha ka jaka ba ju pynlong ha Chibragre, West Garo Hills.

Ia kane u Timothy ula pynbna namar ka Wangala Committee ka sngew lada pynkynriah ia kane ka Tamasa sha shawei ka jaka ka lah ban pynduh noh ïa ka jinglong tynrai bad ka jingdon jingïadei bad ka riti dustur jong ka tamasa.

Haba kren sha ki lad pathai khubor u Timothy ula ong “Ka Wangala Committee bad kiba bun ki dkhot ki sngew ba lada kynriah ïa ka tamasa Wangala sha kawei pat ka jaka, ka lah ban pyn duh noh ïa ka jinglong tynrai jong ka bad kan ktah ïa ki jingsngew paidbah. Kumta, ka Wangala Festival kan long ha ka jaka ba ju pynlong barabor” la ong u Timothy.

U Timothy u la kubur pat ba ka Sorkar ka dang khuslai halor ka jingïar jong ka madan bad la kan lah ne em ban pdiang ïa ka jingbun ki paidbah kiba khmih lynti ban wan sha ka tamasa. U la ong ba yn thaw ïa ka committee kaba hapoh ka jingïalam jong u Deputy Commissioner ka West Garo Hills ban bishar bad ban peit bniah ïa kane ka bynta.

“Ngim pat tip la ka madan kan lah ban pdiang ïa kiba bun ki paidbah. Namarkata, yn thaw ïa ka committee hapoh ka jingïalam jong u Deputy Commissioner ka West Garo Hills ban peit bniah ïa kane ka kam,” la bynrap u Myntri.

U Shira u la ong ruh ba ka Chibragre ka dei kawei na ki jaka ba rim tam jong ka Wangala bad ka jaka kaba ju pynlong ïa kane ka tamasa man la u snem. U la ong ba ka sorkar ka la dep ruh ban pynbha ïa katei ka jaka na ka bynta ka jingrakhe.

Ha kajuh ka por, u Myntri u la pyntip ba ka sorkar ka dang pyrshang ban pynlong ïa ka 1000 Drums Wangala, ha kaba yn don kumba 2,500 ngut ki nongput, ki nongshad bad ki nongrwai kiba ïashim bynta.

“Ha ka jaka jong ka 100 Drums, mynta ngi thmu ban pynlong da ka 1000 Drums. Kane ka mut ba yn don kumba 2,500 ngut ki nongput, ki nongshad bad ki nongrwai kiba ïashim bynta. Ngi dang pyrshang ruh ban pynrung ïa kane sha ka Guinness World Records,” la ong u Timothy D. Shira.