Naduh 10 tarik yn pyniaid kali na ‘Sub-Way’ ha Shillong-Dawki

Ka Sorkar Meghalaya ka la bthah ia ka NHIDCL ba kan pyndep ïa ka jingtei ïa ka Sub-Way ha jaka ba twa surok Shillong-Dawki ba la rong ban sdang ban iaid kali naduh 10 tarik Nailar.

Ïa kane la pyntip da u Symbud Myntri Rangbah ba khmih iaka tnat PWD (Road) u Bah Prestone Tynsong, hadien ka jingïalang bishar kam halor ka jingïaid shaphrang jong ki projek surok bapher bapher hapoh Meghalaya.

Haba kren shaki lad pathai khubor u Bah Prestone ula ong “Ngi la don ka jingïakren kaba bniah bha halor ka jingïaid shaphrang jong ki projek surok bapher bapher. Ym tang ïa ka Shillong-Dawki Road hynrei ruh ïa ki projek ha Garo Hills bad ïa ka High-Speed Corridor”.

U Bah Prestone ula ong ba ha ka jingïalang la shim ïa ka rai ba ka NHIDCL ka dei ban pyndep ban shna iaka Sub-Way ha ka bynta kaba la shah pynjulor ba jur u slap bad ban pynthikna ba yn lah ban plie biang ïa ka leit ka wan hapoh ka 10 tarik Nailar.

“Ngi la rai ba ka NHIDCL ka dei ban pyndep ïa ka subway hapoh ka 10 tarik Nailar. Ha kata ka sngi hi, da kano kano ka rukom, dei ban plie biang ïa ka leit ka wan jong ki kali ha katei ka bynta jong ka surok kaba la shah ktah,” u la ong.

Ula pyntip ruh ba ka jingïalang ka la bishar bad pynbeit ïa bun kiwei pat ki mat kiba ïadei bad ki projek surok ba ka NHIDCL ka pyntreikam ha Garo Hills, bad bun na ki jingeh kiba mih la lah ban pynbeit.