Ki rai ka sorkar lah ban bishar biang katkum ka jingai jingmut ki paidbah: Conrad

U Myntri Rangbah ka Jylla u Conrad K. Sangma hynne ka sngi ula ïashim bynta ha ka jingialang jong ka CM Connect kaba la pynlong ha Soso Tham Auditorium, Shillong ha kaba la iadonlang u Symbud Myntri Rangbah ka Jylla u Bah Sniawbhalang Dhar, ki Ophisar ka sorkar, ki nongmihkhmat na ki Dorbar Shnong bad kiwei. Haba kren ha ka jingialang, u Myntri Rangbah ula ong, ïa kane ka prokram la pynlong kum ka jingpynsngew bad ban jur ba ka synshar khadar ka dei ban long kaba shah shkor bad kaba lah ban leh eiei, khamtam ha ka rukom synshar kaba jyrwit jyrwat.“Ka synshar paidbah kaba shisha ka lah ban treikam tang lada ka sorkar ka dang don ka jingiadei bad iajan bad ki nongshong shnong” la ong u Conrad bad ka bynrap ba ka jingai jingmut jong ki paidbah ka dei ban ïai bteng ban ioh ia ki jingtip kiba donkam haba shim ïa ki rai. Ula kdew ba ki rai jong ka sorkar ki lah ban donkam ban bishar biang katkum ka jingai jingmut na ki paidbah, namar ka jingshakri ïa ki nongshong shnong ka long ka kamram kaba hakhmat eh jong ka synshar khadar.

Ha kaba mynjur ïa ki jingeh ha ki sor kum ka jingpynïaid ïa ka jinglum ñiut, ki surok bad ki jingtei na ka bynta u paidbah, u Conrad ula ong, katba ka jingsngewkhia bad ka jingkynthoh jong ki paidbah ka long kaba donkam, ki lad jingpynbeit kiba tei ruh ki long kiba donkam lang. Ula kyrpad ïa ka jingïakren kaba don burom, haba kdew ba ki Ophisar ki trei hapdeng ki jingeh bad ki donkam ïa ka jingïatreilang na ka bynta ka jingpyntreikam kaba treikam.Ula batai ïa ka rukom treikam jong ka CM Connect da kaba ong, ba ka long ka rukom kaba bun kyrdan ba kyrshan da ka rynsan ban pdiang ia ki jingud jingnam u paidbah ba la pynïasoh bad ka call centre 1971. Ula ong ïa ki jingujor la buh thoh, la bynshet sha ki tnat, la peit bniah lyngba ki dashboard bad la nang pynheh ia ka kam lada slem. U la bynrap ba ka CM-Connect ka don ruh ia ka emergency response tool haba mih ki khep ba donkan kyrkieh ban leh eiei. U la ong shuh shuh ba ïa kane ka model yn nang pynkhlaiñ da kaba pynïasoh bad kiwei ki rukom treikam kiba iasyriem kum ka MLA Connect bad DC Connect, ban pyntikna ïa ka jingïakynduh bad ki nongshong shnong kaba don rukom bad kaba ïai bteng ha man ki jaka. Ula iathuh ruh ba ïa ka CM Connect la rah ban pyni ha ki rynsan jingialang ka ri bad ka la ïoh ïa ka jingithuh kum ka jingpyrshang kaba thymmai ha ka synshar khadar.

“Ngim lah ban pynbeit ïa baroh ki jingeh tang ha ka shi miet. Hynrei lada ngi dang long kiba don ia ka jingmut kaba bha, kiba tei, bad kiba pyrshang ban wad ïa ki lad ki lynti, ngin lah ban ïaid shaphrang da kaba suk bad kaba don jingmut,” ong u Myntri Rangbah bad ka bynrap ba ka jingmut kaba tei ka long kaba donkam na ka bynta ka synshar khadar kaba treikam bha.U Myntri Rangbah ula pyllait ia ka Chief Minister’s Artist Engagement Scheme bad kane ka skhim ka thmu ban kyntiew ïa ka jingpynpaw nam ïa ka kolshor lyngba ki jingthoh dur da kaba pyndonkam ia ki barikor na Jylla ba kin shna ia ki murals bad ki jingthohdur ha ki kynroh surok ha kylleng ka Jylla bad la sam ruh ia ka song pisa ban pynkhreh ia kane ka kam ba long mar T.20,000 sha ki barikor kiba la jied. Ka Shillong Municipal Board ka la ai khusnam ia ki shnong kiba leh khuid bha da ka song pisa, kaba kynthup T.12 lak na bynta kiba wan ha kyrdan ba hakhlieh duh, bud pat ia ka jingai T.10 lak, T.8 lak, bad kiwei ki khusnam katkum ka jingleh bha jong ki shnong.