Pyllait u MR 95 ki kali ka tnad pulit ban pynkhlain ia ka jingtreikam

U Myntri Rangbah ka jylla u Conrad K. Sangma hynne ka sngi, ula pyllait paidbah ki kali thymmai jong ki Pulit ha Police Officers’ Mess, Golflink, Shillong kum ka sienjam ban pynkhlaiñ ia ki pulit ha ka leit ka wan ban iakhun ia ki kam sniew bad shakri kham bha ia ki paidbah ka Jylla.

Ha kane ka prokram la pyllait 95 tylli ki kali na bynta ka Tnad Pulit, kynthup 79 tylli ki kali thied lyngba ka Central Assistance to State Police Scheme ka sorkar Pdeng. Ki kali ba dang thied thymmai ki kynthup 20 tylli ki Maruti Jimny, 19 tylli ki Tata truck, 5 tylli ki Mahindra Mini Truck, 19 tylli ki bus ban kit pulit ba don jaka shong 20 ngut, 10 tylli ki bus ba don jaka shong 24 ngut, 8 tylli ki bus ba don jaka shong 36 ngut bad 8 tylli ki Tata Yodha na bynta ka CID. Ia kine ki kali 95 tylli la thied ha ka dor ba kot T.30 klur, ka sorkar ka la pynkhlain ia ka jingtreikam, ka leit ka wan haba don kino kino ki jingjia ba donkam kyrkieh ki bor Pulit ha Jylla.

Ha kane ka sngi la iadonlang ka Director General of Police ka Kong I Nongrang, ki Ophisar Sorkar, ki Heh Pulit bad kiwei kiwei.

Ha kaba kren ha ka jingialang, u Conrad K. Sangma ula ong “Ka jingpynneh ïa ka suk ka sain ka dang long kawei na ki kam kiba kongsan tam jong kano kano ka sorkar. Ka jingkut jingmut jong ngi ban pynkhlaiñ ïa ka jingpyntreikam ïa ka aiñ ka paw ym tang ha ki ktien jong ngi, hynrei khamtam eh, ha ki kam jong ngi”.

Ula ong, ba ka jingpynkhlaiñ ïa ka tnad pulit ka dang long kawei na ki kam kiba hakhmat eh jong ka sorkar bad pynpaw ba ki jingpynkylla kum ka Police Reserve Fund, kaba la sdang kum ki jingai jingmut na ki Ophisar kiba don ha ki distrik bad kaba la kylla long ki jingtuklar naduh tynrai kiba don jingmut bad lyngba kine ki jingpynkylla, ki jingtei kiba la jot mynshuwa mynta la maramot bad pynbha pat ia ki. Kaba kongsan tam, la aiti ïa ka bor bad ka jingkitkhlieh sha ki Superintendent of Police bad ki unit commander, ban pyntikna ïa ka jingpyntreikam kaba kloi bad kaba treikam bha.

U Myntri Rangbah ula kdew ruh ïa ka jingthungkam ïa palat 3,000 ngut ki Pulit ha ki jaka ba lait thylli la slem, da kaba khot ïa ka kum kawei pat ka jingpyni ïa ka jingkut jingmut jong ka sorkar ban pyntikna ba ki bor pulit ki don ïa ki briew bad ka jingkyrshan kaba donkam ban pyndep hok ïa ki kamram jong ki.

U Myntri Rangbah ula ïaroh ïa ki bor pulit na ka bynta ka jingstad ha ka rukom treikam, ka jingdon akor bad ka jinglah ban kiar bad iai shah. Ha kaba kdew ïa ka jingïakynad ba dang shen ha Lapangap, West Jaintia Hills, u la kdew ba ki pulit ki la don bynta kaba kongsan ban pyntikna ïa ka jingsuk bad ka jingjai jai ha ka thain katba ka sorkar ka dang ïai bteng ïa ka jingïakren bad ki kynhun na Assam ka kam ïapynbeit khappud.

U Myntri Rangbah ula ai khublei ruh ïa ka Director General of Police ka Kong Idashisha Nongrang bad ïa ka kynhun jong ka baroh kawei, na ka bynta ka jingtrei shitom, ka jingïalam bad ka jingkut jingmut ban pyntikna ïa ka shongsuk shongsain la pynneh hapoh ka Jylla.