Kyntait u Bah Titos ia ka khubor ba thmu leit iasoh BJP ki MLA UDP

U nongialam ka United Democratic Party (UDP) u bah Titostarwell Chyne ula kyntait ia ka jingmih khubor halor ka jingdon jingthmu ban rung BJP ki MLA ka party.

U bah Titoss haba kren sha ki lad pathai khubor ula ong, ba kane ka lah ban dei ka plan jongno re jongno ban pynkulmar ia ka longiing ka UDP, khnang ban wanrah ia ka jingtharai sniew hapdeng para MLA bad kumjuh ki nongialam ka Party.

Kum ban shu kdew ka khubor ka la sawa sted ba kin don kumba 9 ngut ki MLA ka UDP kiba lah ban leit pyniasoh noh sha ka BJP.

Ula ong ,“Haduh kane ka khyllipmat kam shym don kano kano ka jingthmu ba ki MLA jong ngi, kin don kata ka jingthmu ban iasoh bad ka BJP.”.

U bah Titos ula ong ba kane ka khubor ka sdang ban mih dei naduh ka por ba ki MLA lyngba ka jingtip ka party ki leit ban iakynduh ia u Amit Shah u Myntri ka tnad Kam Pohiing ka sorkar pdeng ban iakren halor ki katto katne ki ishu kiba kongsan kiba iadei bad ka bha ka miat ka jylla. Kawei na ki mat ka long halor ka FCRA, ka ILP, ka MRSSA,Them motor bad halor ka jingshah ktah ka jingkhang tih dewiong ha kaba la shah tang ia ki Scientific Method.

“Hynrei hadien kane, ngi sngewthuh mynta ba la don ba shim kabu ia kane ka jingleit iakynduh jong ki ia u heh ka BJP bad ki la pynwan dur ia kane ka khubor ban ong ba ki MLA ka UDP ki thmu ban iasoh bad ka BJP,” ong u bah Titos.

Katkum ka jingong u bah Titos haduh mynta ka party ka la iakynduh ia ki MLA bad ka la don ruh ka jingialang jong ka Parliamentary Meeting ha kaba u nongialam ka party ula khot bad ha kane ka jingialang la jan baroh ki MLA ki la ia donlang bad la kren shai ba kam don kaei kaei kaba kum kata.

Ula pynpaw ka jinglyngoh haba ki MLA jong ki, ki leit ia ka kam lajong, ki ia leit ha Kolkatta ruh ki la shah ban pyllong ishu.

Ha kajuh ka por, ula mynjur ba ki don katto katne ki jingeh bad ka jingbym hun bad ki don lehse katto katne ngut ki nongialam kiba don ia ka jingeh, hynrei kane kam mut pat ban don mano mano ban shim kabu ia kane, namar kane ka dei ka kam iing kam sem jong ki.

Ula bynrap, “Ka jingshim kabu ka long tang ban pynlehrain ia ki MLA ban pynhiar ia ka kyrdan jong ki.”