La 10 snem ym don jaka thiah shynrang ha Umsning CHC Ïa kynduh ki RS ia u Doktor ba dei khmih

Ka Umsning Block Headman Forum, kaba kdup lang ïa ki Rangbah Shnong jong ki shnong kiba hap hapoh ka Umsning Block, ka la leit ban jurip ïa ka Umsning Community Health Centre, ne ka Umsning CHC, ban peit ïa ka jinglong jingman jong ka jaka ai jingsumar bad ban ïakren halor ki jingduna bad ki jingeh kiba ktah ïa ka jingshakri paidbah.

Ha kane ka jingleit jurip, ki dkhot jong ka Forum ki la ïakynduh ruh ïa u Doctor Incharge jong ka CHC, ha kaba la ïakren halor ki mat kiba kongsan kiba ïadei bad ka rukom treikam ka CHC bad la lamkhmat da u President ka Forum, Bah Frankie Nongrum, uba long ruh u Rangbah Shnong ka Umsaitsning Lad Mawrong, u Adviser ka Forum, Bah Marchal Nongshli, uba long ruh u Rangbah Shnong Nongthymmai, ryngkat bad kiwei kiwei ki dkhot jong ka Forum.

Haba kren sha ki lad pathai khubor, u Bah Frankie Nongrum u la ong ba ka jingïakynduh ïa u Doctor Incharge ka long ban pynpaw ïa ki jingduna bad ki jingdkoh treikam kiba la ktah ïa ka jingshakri, kaba pynjynjar ruh ïa ki paidbah kiba wan wad jingsumar ha kane ka CHC.

U la pynpaw kyrpang ïa ka jingbym don ki jingthiah na bynta ki shynrang ha ka Male Ward, kaba la neh palat 10 snem. Hynrei, ha kane ka jingïakynduh, u Doctor Incharge u la pyntikna ba hapoh une u snem yn pynbiang noh ïa ki jingthiah na bynta ki shynrang ha ka CHC.

Nalor kane, ka Forum ka la ïakren ruh halor ka jingduna ki nongtrei, khamtam eh ki technician, namar ba don kiba la shongthait bad don ruh kiba la khlad noh bad Ka jingduna nongtrei ka la ktah ïa ka rukom treikam bad ka jingshakri jong ka CHC.

Kumta, ka Umsning Block Headman Forum ka kyntu ïa ki bor ba dei peit ba kin pynsted ban pyndap noh ïa ki kam kiba dang thylli, khnang ba ka CHC kan lah ban ai ka jingshakri kaba kham bha bad kaba biang ïa ki paidbah.

Ka Forum ka la pynpaw ruh ïa ka jingdonkam ban pynsted ïa ka jingïakren halor ka jingpynïaid “One-Way” ha ka surok kaba ïaid na kane ka jaka, kumba la dep ïakren mynshwa, khnang ban pynsuk ïa ka leit ka wan jong ki kali bad khamtam eh ki kali ambulance kiba kit ïa ki nongpang.

Ha kajuh ka por, ka Forum ka kyntu ruh ïa ka tnat PWD ban shimkhia ban pynbha biang ïa ki nala kiba don harud ka surok jong ka Umsning CHC, namar ka jingbym biang ki nala pynïaid um ka la wanrah ïa ka jingsniew biang jong ka surok.

Ka Umsning Block Headman Forum ka khmih lynti ba ki bor ba dei peit kin shimkhia ïa kine ki mat, khnang ba ka Umsning CHC kan lah ban pynkhlaiñ shuh shuh ïa ka jingshakri bad ban ai ka jingsumar kaba kham biang sha ki paidbah.