Mynjur ka sorkar ia ka MEVP, T.25 hajar yn siew ia kiba thied kali ilektrik

Ka kynhun Myntri hynne ka sngi ka la mynjur ïa ka Meghalaya Electric Vehicle Policy 2026 bad kan siew T.25 hajar ban pynshlur ia ki briew ba kin thied kali ilektrik, na bynta ka jingkhuid ka lyer bad ka mariang.

Haba kren sha ki lad pathai khubor u Spokesperson ka Sorkar MDA u Marcuise N Marak ula ong ba katkum ka Meghalaya Electric Vehicle Policy 2026, uno uno uba thied kali elektrik un ïoh T.25,000 kum ka jingïarap pisa bad yn map lut ïa ka bai Registration kali.

“Ka Kynhun Myntri ka la mynjur ia ka Meghalaya Electric Vehicle Policy 2026. Ban pynshlur ia ki briew ba kin pyndonkam noh da ki kali elektrik, ka Sorkar kan ai ia ka jingmyntoi ba T.25,000 sha man ki briew ba thied kali elektrik. Nalor kata, ia ka bai register run un pyllait pura” la ong u Marcuise.

U Marcuise ula pyntip ba ka Jylla mynta kala dep don ia palat 5000 tylli ki kali elektrik ha surok bad kane ka policy la khmih lynti ba kan sa nang pynbun shuh shuh ia ka jingdon ki kali elektrik.

Kane ka policy kan treikam ia ki kali arshaka, lai shaka bad ki kali saw shaka, ula ong.

Halor ki jingtei, u Myntri ula pynpaw ba ka Sorkar kam iohi satia ia kano kano ka jingeh ha ka jingbuh ia ki charging station.

“Ki charging station ki lah ban mih hangno hangno. Na ka bynta ki commercial station, ngi la dep ban ithuh lypa ia ki jaka kiban sa buh ia ki” ula ong.

Ka kynhun Myntri kala iakren ruh halor ka Vehicle Scrappage Policy, bala pynmih jingpynbna ha u snem bala lah. Hapoh kane ka plan, ki trai kali kiba die scrap ia ki kali bala rim palat 15 snem ki lah ban pyndonkam ia ki certificate ban thied ia ki kali EV ba thymmai bad ioh ia ki jingmyntoi.

Ka kynhun Myntri kala mynjur ruh ban thung ia u Bah BM War, Chief Engineer (Civil) bala shongthait ka Meghalaya Energy Corporation Limited (MeECL), ban long u Chief Technical Advisor (Generation) ka Tnad Bording, haba shim ia ka jingshemphang jong u ban kyrshan ia ka kam pynmih bording hapoh ka Jylla.