Pynpaw ki Rangbah shnong ha u MR, ki paitbah ha Shillong ki kynduh bun ki jingeh

Ki Rangbah shnong ka nongbah Shillong hynne ka sngi ha ka jingialang jong ka CM Connect-Public Consultative Meet ki la pynsngew sha u Myntri Rangbah ka jylla u Conrad K. Sangma halor ki jingeh ba ka shnong ka iakynduh halor ka umbam umdih, ka bording, ka surok nalor kiwei de.

Ha ka jingiakren bad ki katto katne ngut ki Rangbah shnong, ki la pynpaw ba ka jingeh ba hakhmat eh jong ka shnong ka dei halor ka umbam umdih, ki pipe um, nalor kiwei de.

U Rangbah shnong ka Jaiaw Laitdom ula iathuh ba ka shnong Jaiaw Laitdom ka don 7 tylli ki Block, 1483 tylli ki tnum iing bad 5784 ngut ka jingbun paid.

Ula ong ba ka jingeh ba hakhmat eh ka shnong ka long haba ia dei bad ka jingsam umbam umdih. Ula iathuh ba ki don 11 tylli ki top RCC Tank bad ka um ba wan na PHE ka mih tang 30 minit bad mar ia plie ia top um, ka um tang 5 minit ka la jah.

Nalor kane, ula iathuh ba ula pynsngew ruh halor ka jingdonkam ban bujli mardor ia 3 tylli ki nar elektrik ba la sarang kiba long jingma ia ki paidbah.

Katba na ka liang jong u Rangbah shnong ka Lawjynriew ula ong ba ki don bun ki jingeh ba ka shnong ka iakynduh hynrei hynne ka sngi um shym la ioh lad ban pynsngew namar ba u Myntri Rangbah u la kyrkieh.

Ula iathuh ba ka shnong ka iakynduh jingeh haba iadei bad ka um, ki Borowel bad bun ki pipe um ha shnong ki la sarang bad ki surok ki lynti syngkein ba sniew.

“Haba iadei bad ki pipe um kiba la sarang, ngi la phah ia ka jingkyrpad naduh mynshem snem hynrei haduh mynta ngim pat ioh eiei bad haba iadei bad ki surok, ngi la ai ia ka dorkhas sha u Myntri Rangbah bad sha ka tnad PWD, ngi kyrmen ba mynta u snem hadien ka lyiur ngin lah ban ioh ia ka surok ba biang,” ong u Rangbah shnong ka Lawjynriew.

Na ka liang u Myntri Rangbah hynne ka sngi ha ka jingialang ula sngap ia ki jingeh jong ki Rangbah shnong bad kumno ban pynbeit ia ki ha ryngkat ka jingdonlang ki ophisar kiba la ai ia ka jubab ban pynshai ia ki jingpynsngew jong ki Rangbah Shnong.

Ia kane ka jingialang la pyllong da ka tnat Urban Affairs, ka Sorkar Meghalaya ryngkat ka Shillong Municipal Board ha U Soso Tham Auditorium, Shillong ha kaba la wan iashim bynta lang da ki ophisar na ki tnad sorkar bapher bapher, ki dkhot nongkitkam shnong nalor kiwei de.