Pynpaw ki sengsain pyrthei ka jingsngewkhia halor ka jingpyntreikam ia ka SIR

Ki seng sain pyrthei bapher bapher ki la pynpaw ia ka mat halor ka jingpynrung kyrteng (Register) ar sien, ka jingwan ki briew nabar bad ka jingpynrung kyrteng ha ki EPIC card ha ki thain khappud ha ka jingialang kaba la lum da u Chief Electoral Officer (CEO) na ka bynta ban sdang ia ka Special Intensive Revision (SIR) jong ka thup kyrteng ki nongthep Vote ne Electoral Roll.

U Vice President ka United Democratic Party u Bah Allantry Dkhar ula ong, ba ka UDP ka la pan jingpynshai halor kane ka jingleh ba khatduh ia kane ka kam ha u snem 2005.

“Ngi don ia ka jingsngewkhia halor ki kyndon bad ka rukom treikam jong ka special intensive revision (SIR). Ia kane la leh lah slem bha ha u snem 2005. Kane ka dei ka sien kaba khtaduh eh. Kumta u CEO bad ka kynhun jong u ki la long kiba kloi ban pynsngewthuh ia ki rukom ban leh hapoh ka jylla Meghalaya,” la ong u Bah Alantry.

U la bynrap ba ka mat ba sngewkhia ka seng UDP ka dei ka jingdon ki nongthep vote ha ki jaka kiba don ka kynrum kynram.

“Ka jingsngewkhia ba hakhmat ka dei ka thain khappud bad ha ki katto katne ki jaka khamtam ia ka mat ban pynrung kyrteng ar sien ha kylleng ki jylla bad kumjuh ruh ki briew ba shu wan rung tuh nabar kiba la ioh rieh tngen ha ka jylla jong ngi,” ula ong.

U Bah Alantry ula bynrap ba ka ophis jong ka Election ka la shimkhia ia kine ki jingkhuslai kiba ki la pynsngew.

“Ka kynhun jong ka tnad Election ka jylla ka la pynthikna bad ka la pyni ruh ia ngi da ka jingbatai ba bniah lyngba ka “Presentation” ba baroh kiei kiei ki dei kiba la leh ban pynthikna ba kin ym don satia ki nongthep vote ba don jingsuba. Kim don kino kino ki nongthep vote ki bym dei ki nongshong shnong ka jylla” ula ong.

Halor ki sienjam ki ban sa shim da ka seng, ula ong, “La pynbeit ia ka por bad ngin sa khmih bniah bha kumno la pyniaid ia ki kam ki jam ha kaba yn sa thung ia ki Booth Level Agent (BLA) na ki seng sain pyrthei bad nga ngeit ba kane ka rukom leh hapoh Meghalaya kan pynurlong ia ka jingthmu ban don ia ki nongthep vote kiba thikna ha ka thup kyrteng ki nongthep vote ne Electoral Roll”.

U Nongialam ka NPP uba la iashim bynta ha kane ka jingialang ula ong, ba ka seng ka la buh jingkylli halor ka jingpdiang ia ki kot ki sla. “Ki la pynshai shaphang ka SIR bad kiei kiba donkam, ki kot ki sla aiu kiba donkam” la ong une u nongialam.

“Ngi lah pynpaw ia ki katto katne ki mat na ka seng, ngi sngewkhia bad ki rukom ai ia ki kot ki sla ne syrnod da ki bor shnong, ia kaba la ioh ia ka jingpynshai na u CEO ba kim ju pdiang ia ki kot ki sla ba ai da ki Rangbah Shnong hynrei ki kot ki sla kum ka ST, ki la phah sha Delhi bad sha ka Sorkar Pdeng bad u CEO u dang ap ban ioh ia ka jubab” la ong u Nongialam ka NPP.

“Ka jingbatai ba ngi la ioh halor katei ka mat” ula bynrap ka ECI kam ai jingithuh ia ki kot ki sla bad ki syrnod ba ai da ki Rangbah Shnong.