Ki paidbah ki shaniah ia ka Akashvani kum ka nongai jingtip ia ka Ri

Kum shibynta ban rakhe ia ka jingdap 90 snem ka jingshakri kum ka nongai jingtip ne pathai khubor sha ka ri, ka Akashvani Shillong ryngkat ka Akashvani North Eastern Services (NES) ki la pynlong ka prokram halor ka put ka tem bad rwai tynrai mynta ka sngi ha ka State Convention Hall, Shillong.

Ha ka prokram la shim bynta da ki kynhun tem bad nongrwai pawnam na ka jylla kynthup ka Balahpynhun Mawlong ryngkat ka kynhun, ki jingrwai Garo da ka Ahowee folk band bad ki jingrwai Jaintia da Seinraij Art & Culture Group.

La ioh ruh ki jingrwai na i kong Shirley Passah, ki jingrwai Hindi na I kong Ribhakupar Shadap, iba la jop ia ka thup Modern Folk ka NE Body can Sing ha u snem 2016, ka prokram kaba wad ia ki briew don sap ha ka put ka tem ha ka thain shatei lammihngi ba la pynlong da ki Akashvani station.

Ha ka jingai jingkren u kongsan, Principal Secretary ka jylla, u bah Frederick Roy Kharkongor ula pynpaw ia ka jinglah ka Akashvani ban pynlong ia katei ka prokam ban kyntiew ia ki riew donsap.

“Kane ka long kum ka jingjam ia u mawmer ba kongsan ia ka Akashvani ka don palat 90% ha India. Wat hapdeng bun ki lad pathai khubor ha ka juk mynta, kum ka print, electronic media bad online media, ka jingshaniah ki paidbah ka kham bun ha ki khubor ka Akashvani namar ki ai ka khubor ba shisha,” u la ong.

Ha kaba kren shaphang ka Mann Ki Baat ula ong, “u Myntri Rangbahduh Narendra Modi u iakren bad ki nongshong shnong shaphang ki kam bapher bapher. Ka Meghalaya ka la paw ha bun ki bynta ha ki jingkren u Myntri Rangbahduh. Kumta haba ngi kren shaphang ka sur, ka jingpaw bad ka jingkongsan, nga tharai ka Akashvani ka don hakhlieh duh.”

U la ai jingiaroh ia ka Akashvani bad Doordarshan ki rynsan ba biang na bynta ki briew ba don sap. “Ka lad ia ki ban poi sha ki iing ha kylleng ka jylla bad sha kiwei ki ri,” u la ong.

“Ha ka jingrakhe dap 90 snem, sngewbha bteng ban leh ia ka kam ba bha kum ka paralok bad ka sur jong ka ri bad bteng ban wanrah ka jingbha bad ka sur ia ki riew donsap nalor ka kam pathai khubor,” u la bynrap.

U Assistant Director, Engineering, Akashvani Shillong, Antony War ula ai jingkren pdiang ia baroh kiba wan shim bynta katba ka Assistant Director, Programme, Akashvani NES Shillong, ka kong Evelyn Khongsit ka la ai khublei ia baroh ki nongwan shim bynta bad ki paidbah.

Ha ka prokram la nalor u Principal Secretary ka jylla, Frederick Roy Kharkongor la donlang ruh u Zonal Director, Indian Council of Cultural Relations, Northeast Zone, Dr.Munish Singh, u S.K Deohare, DDG Admin, ADG Office, Admin & Broadcast Operations, North East Zone (NEZ) kiwei kiwei kiwei.