Plie ka Siemens ia ka jingthep aplikashon na ka bynta ka sien ba 14 jong ka prokram ai scholarship ka jong ka na ka bynta ki khynnah ba pule engineering

Ka Siemens Limited ka la pynmih ia ka sien ba 14 jong ka Siemens Scholarship Program bad ka la khot sngewbha ia ki applikations na ki samla ba pass bha kiba dang shu sdang ia ka jingpule engineering ka jong ki na ki jaka pule engineering jong ka sorkar ha kylleng ka India. Kane ka jingpynsdang ka wanrah ia ka jingiarap ha ka liang ka pisa pilain na ka bynta ki khynnah ba dei hok ban ioh kiba duna ia ki lad ki lynti ha ka liang ka ioh ka kot bad kan ai jingkyrshan ia ki ha baroh ki saw snem jong ki jingpule engineering ka jong ki.

Kaba treikam katkum ka German Dual Education, kane ka prokram ka pyniasoh ia ka jingpule bad ka jingioh jinghikai na ki karkhana ban iarap ia ki samla ba kin nang san ha ki kam kiba iadei bad ki jingshna kiba la pynkhreh lypa na ka bynta ki karkhana ba pher ba pher bad ia ki engineer bad ban thaw kam ha ka engineering, ka jingwad bniah bad ha ka shna jingshna. Kane ka prokram ruh ka pynleit jingmut ha ka jingsan kaba kyllum, katba 50% na ki scholarship la buh na ka bynta ki khynnah kynthei ban nang pynkiew ia ka jingioh lad kaba mar katjuh ha ki jingpule kiba long technical.

Kat haduh u snem 2026, pakat 2,300 ngut ki khynnah pule na ki 176 tylli ki jaka pule engineering kiba dei jong ka sorkar ha kylleng ki 28 jylla ki la iashim bynta ha ka Siemens Scholarship Program.

Ha Shillong, kane ka programme kan lah ban ai lad ia ki samla pule kiba deihok ban ioh na ki jaka pule engineering jong ka sorkar ha Meghalaya ban ioh ia ki jingkyrshan ha ka liang ka pisa pilain bad ki jingsan kiba ia dei bad ki karkhana treikam, khamtam kito kiba na ki iing ki sem kiba kham duna ha ka liang ka ioh ka kot kiba wad ia ki jingpule technical bad ki lad ki lynti ha ka liang ka kam ka jam.

Ki khynnah pule kiba haduh 20 snem kiba pule ia ka Mechanical/Production, Electrical, Electronics/Instrumentation, Electronics & Telecommunication, lane Computer/Information Technology kin lah ban apply. Ki nongthep kin donkam ban ioh la kumno kumno 60% ha ka SSC, 50% ka jingkhein mark ne aggregate ha HSC lane kaba iahap bad kane bad 60% ha ka PCM, lem bad ka jingioh jingkot man la u snem kaba ym tam ia ka Rs. 2 lak tyngka. Ka jingthep kyrteng kan kut ha ka 10 tarik Risaw 2026, lyngba ka www.siemens.co.in/scholarship.