Ka jingiakop mareh kulai ka dustur tynrai ha shnong Mynni Mawbri

Ki bor pynïaid District ka West Khasi Hills ryngkat ka jingïatreilang ka tnad Tourism, Haikai Travels bad Mynni Mawbri Multipurpose Primary Agricultural Credit Cooperative Society Ltd.,ki la pynlong ka iakop shong kulai bad pynher kotkudi ha shnong Mynni Mawbri, West Khasi Hills kum shibynta ka jingrakhe ia ka Jubilee Ksiar ne ka jingdap 50 snem ka West Khasi Hills District kaba dang iaid shakhmat.

Kine ki jingialehkai kum ka jingiakop mareh kulai ka pyni ïa ki riti dustur tynrai ba riewspah ka thaiñ, namar hakiwei ki jaka ym ju kham iohi khoit ha kine ki sngi, kaba long ban pynbyrngia bad pynshlur ïa ki paidbah ban ïashim bynta ha ka jingrakhe Jubili Ksiar ha kaba ki paidbah nongshong shnong ki la shim bynta shitrhem.

Ha ka prokram la donlang u Superintendent Police, West Khasi Hills District, bah H. Kharkongor; Block Development Officer (BDO), Mawshynrut bah R. Kharkongor, Tourist Officer, Nongstoin bah Marc A. N. Diengdoh, Rangbah Shnong ka Mynni Mawbri kiwei kiwei

Ki nongjop ha ka jingiakop pynmareh kulai ki long banyngkong u Kynsaiborlang Wahlang, ba ar u Wosligen Wahlang, bailai u Eric Kharbani. Ki nongjop ha ka iakop pyni kulai ki long banyngkong kulai Saw jong u Sabut Wahlang, ba-ar Lai Lieh jong u Pleindar Sangriang bad balai Koh Mut jong u Beindinglan L. Marshillong.

Katba ki nongjop ha ka jingiakop pynher kot kudi ki long u Zachary Khongtim ba pynher jrong, ba-ar u Jubilathmu Mawlieh bad lai u Khraw Mawlieh.

Ha kane ka jingiakop ki don ruh ki khusnam pyntngen ne Consolation prizes ia ki nongshim bynta halor ka jingtbit jong ki kumno ban pynher kot kudi ki long banyngkong u U John F. Khyriem, ba-ar u Pynshaibor Marwein, balai Kailas Lyngdoh Nonglait, basaw ka Longkmen Jat, basan u Ioannis Marwein.

Kane ka prokram ka pynsah jingkhynmaw ha ka jingrakhe ia ka Jubili Ksiar Disttrict, kaba la wanrah lang ia ka riti dustur, ka mynsiem ialehkai bad ka jingiashim bynta ha ka imlang sahlang. Ka jingïalang ka la pynpaw ruh ïa ka jingdonkam ban pynneh pynsah bad kyntiew ïa ka pateng tynrai ban sah kynmaw ïa ki san phew snem ka jingïaid lynti bad jingroi jong ka District.