Thombor 5 ngut ki dkhot ka NEHUSU ia u Assistant professor NEHU

U nonghikai Assistant professor ka skulbah North Eastern Hills University (NEHU) u Dr Alok Singh ula kynnoh ba ki don Hynriew ki samla jong ka seng ki samla pule ka North Eastern Hills University Students Union (NEHUSU) kiba la donkti ban wan shoh ban dat ia u, khlem kano kano ka daw. Ha shwa kane ki nonghikai jong kane ka skulbah NEHU ki la ialum lang ban iakren halor kane ka jingshah shoh une u nonghikai ka skulbah kaba la jia ha kane ka sngi Palei ka 24 tarik Iaionng ha ka por kumba 4 baje tam eiei janmiet. Haba kren sha ki lad pathai khubor, u Alok u la kynnoh ba ki don 5 ngut ki dkhot kynthup u President ka NEHUSU u samla Sandy Sohtun uba u la ithuh dur khmat, ki la wan wanrung sha kamra treikam jong u bad ki la shoh la dat ia u ha kaba u la mynsaw na ka bynta jong ka kti, ka met bad ka ryndang.

Haba kylli halor kaei ka daw ba ki la wan ban shoh ia u, u Prof Alok ula ong ba ki kynnoh ia u ba u leh politik da kaba seng ia ka kynhun seng kaba u ruh um shym la don jingtip eiei halor kata. “ Ki don hynriew ngut baroh kynthup u President ka NEHUSU u Sandy Sohtun kiba la shu wanrung ha kamra treikam jong nga bad ki wan shoh. Arngut napdeng kine ki la bat ia ka kti jong nga bad ki la shoh ia ki kti ki kjat, ka met bad ka khlieh. Haba kylli kaei ka daw, ki ong ba nga leh politik hangne,” ong u Prof Alok. Ula ong ba kum u nonghikai um shym la mutdur ba kum kane ka jingjia kan wan jia ha ka jingim jong u. Ula kyntu ia ka sorkar ba kadei ban buh ia ki briew ban pahara ha kane ka jaka khnang ba kum kine ki jingjia kin nym wan jia shuh nangne shakhmat.

Halor kane ka jingjia, na ka liang u Alok hynne ka sngi u la ujor da ka ejahar ha Mawkynroh Police Outpost khnang ba ki bor ka ain kin leh ia kaba donkam.