Ai jingthoh bad sabut ka KSU sha ka MSPCB ban pyrshah tih Mawshun ha Lum Syrman

Ka KSU East Jaintia Hills District Unit ka la pynpaw ba ka pyrshah ia ka jingthmu ka Meghalaya State Pollution Control Board (MSPCB) ban pyllong ia ka public hearing ne ka jiingpynshai paidbah halor ka projek tih mawshun jong ka kompeni M/S Shree Cement Ltd ha Lum Syrman, East Jaintia Hills.

Ka KSU-EJH hynne ka sngi ha ka jingiakynduh ia u Member Secretary ka MSPCB ka la aiti ia ka jingthoh bad ki sakhi satar ban pyni ba shispah percent ki paidbah khamtam ki trei jaka ki pyrshah ia ka jingwan kane ka komepeni Cement.

Haba kren sha ki lad pathai khubor u President ka KSU-EJH u bah Streamly N. Suchen ula ong ba ka seng ka la pynpaw ba ka pyrshah jur ia ka public hearing ba ka ka thmu ban pyllong ha katei ka thain namar ba kim kwah ba kane ka Cement kan wan ban pynduh ia ki um ki wah, ki lyngkha bad ki khlaw ki btap.

“Ngi la ai ia ki sakhi satar ba ki trai jaka kiba la pynpaw ba ki pyrshah bad da lei lei kim kwah ba ka Cement kan wan iuhkjat ha kane ka thain,” ula ong.

U Bah Suchen ula ong ba kaba kham sngewphylla ka long ba ia kane ka Hearing yn pyllong ha ka por 8 baje bad la suba ba ka don eiei sha lyndet.

“Kane kadei ka plan ba shyrkhei jong ka sorkar bad ka lah ban don kaei kaei sha lyndet,” la ong u bah Suchen.

Halor kane, katkum ka jingong u bah Suchen na ka liang jong u Member Secretary ula ong ba kane ka Hearing yn iaid beit kum ha ka por ba la buh namar ba don ki paidbah ha ka thain kiba kyntu ban buh bad ban pyllong beit ha katei ka por ba la buh, khnang ba kin ioh ban beh sha ki kam ki jam.

Ula ong ba ki paidbah ka thain ha kine ki sngi ki la mih surok ban pyrshah ia ka jingwan kane ka kompeni bad kum ka seng ruh kan iai don ryngkat bad ki trai shnong kiba don ha ka thain.

“Ngi lah ban ong ba shispah la shispah, lada wan kane ka kompeni , ki khlaw ki btap kin duh lut bad khamtam ia ka jaka bad ka umbam umdih. Ka jingwan kane ka kompeni, kiba iohnong kin dei beit tang ki marwari bad ki briew kin sa kylla ki phetwir namar shisien ba la duh ia ka jaka trei, ka lyngka ka umbam umdih ka la eh ia ki,” ula bynrap.

Ha kajuh ka por ula kyntu ia ki bor district ba kim dei ban khang lynti ia kino kino ki paidbah kiba wan ha ka Hearing.