Pynhap pyrda u Bah PT Sawkmie ia ka Jubili Rupa ka MARODA

U MLA barim u Bah PT Sawkmie kum u kongsan u la pynhap pyrda ia ka jingrakhe Jubili Rupa jong ka Motphran Autorickshaw Owner’s and Driver’s Association (MARODA) kaba ki la pynlong ha National Dorbar Hall, Mawkhar ha ka sngi Saitjain.
Haba ai jingkren u bah Sawkmie u la pynpaw ba ki don ki khun ba ki sngewsarong ba u kpa jong ki u dei u pilot, kaba ki ju khot ha ki por mynshuwa, kaba mut u driver uba ki ju tip mynta.
Ia kaba u la iathuh ruh ba une u driver u la lah ban pynnang pynstad ia la ki khun, ban long ki engineer, ki ophisar bad kiwei ki kyrdan heh ha ka jingim jong ki.
Ha kajuh ka por u kyntu ia baroh ki driver jong ka MARODA ba ki dei ban long kiba leh khuid bad ba kamai la ka hok.
Hashuwa kane kum u kongsan u la nohsynniang ruh sha ka MARODA kum shi bynta ban iarap lem ia ka jinglut jingsep jong ki.
Ha kane ka sngi la ioh ia ka jingrwai na ki driver bad ia ka jingrwai bad ka jingphawer na u Akbar bad ka kynhun, kiba la pynshongshit ia kane ka sngi.
Ha kajuh ka por la ioh ia ka jingkren pdiang sngewbha na u President ka MARODA bah Evandul Marbaniang, kumjuh na u bah Sairos Diengdoh, ba la iathuh lyngkot kumno ba la seng ia ka MARODA, la ioh ruh ban pule ia ka kaiphot jong ka seng na u bah T. Sawian, Vice President ha ka jingdon ryngkat ki driver ka MARODA bad kiwei kiwei.