Pynkynriah ka sorkar ia ki nongdie na Jail Road bad Polo sha Parking Lot SBI

Ka tnad Pynroi Sor ha ryngkat ka jingiatreilang bad ki bor ka District East Khasi Hills, ka la lah ban pynkynriah ia baroh ki nongdie madan na ka thain Polo bad Jail Road sha ka jaka ba la pynkhreh da ka sorkar. Kane ka long shi bynta jong ka jingpyntreikam ia ka skhim Meghalaya Street Vendors (Protection of Livelihood and Regulation of Street Vending) Scheme, 2023.

Ka Kyrwoh na u Commissioner & Secretary ka tnad Pynroi Sor la ong haba sdang ia ki jingtrei ba la dep pyniaid shakhmat ha Khyndailad bad Shillong Civil Hospital, ka sorkar ka la pynkynriah ia ki nongdie madan sha Parking Lot mar pyrshah ka SBI hajan ka Matri Mandir, Polo.

La ong ba ki nongdie madan kiba shong dukan mynshwa ha shi lynter ka Jail Road na OB Shopping Mall shaduh Petrol Pump (MTC complex), la pynkynriah ha Parking Lot mar pyrshah ka SBI ha kaba ki nongdie madan ki la sdang ia ka kam khaii pateng jong ki ha ki dukan ba la pynkhreh da ka sorkar.

Ki dukan hajan Matri Mandir, Polo ki don haduh 132 tylli ki dukan, ha kaba ki don 70 tylli kiba shong briew. Katba ki dukan ha jaka ieng kali mar pyrshah ka SBI ka don 79 tylli ki dukan ha kaba 9 tylli ki dei kiba la shong die.

Na ka liang ka sorkar ka la pynkhreh ba lashai ka sngi ka 29 tarik, Naitung ban pynkynriah sa ia 22 ngut ki nongdie madan na Secretariat Hills bad IGP sha ki jaka ba la pynkhreh ha Parking Lot mar pyrshah ka SBI.

Ka jingpynkynriah ia ki nongdie madan ka long ka kam kaba donkam ban don ka jingiatreilang bad ki nongshong shnong.

Haba iadei bad ka Polo, ka Town Vending Committee ka la pyllong ia 29 tylli ki jingialang bad ka kynhun jong ki nongdie madan ha shwa ban pyntreikam bad ia kane baroh la pyndeo katkum ki kyndon jong ka ain .

Ka tnad kan sa sdang ban pynkynriah ia ki nongdie madan ha Laitumkhrah naduh ka 17 tarik Nailar 2025.